Аўгуста Піначэт шпіталізаваны :: Хартыя'97 :: Навiны

Былы чылійскі дыктатар Аўгуста Піначэт зьмешчаны ў чацьвер у ваенны шпіталь Санцьяга. 87-гадовы генэрал атрымаў бытавую траўму ў сваёй загараднай рэзыдэнцыі.

Паводле сябра экс-дыктатара, які пажадаў не называць сваё імя, Піначэт “пашкодзіў хрыбетніцу пры падзеньні падчас прыняцьця душа”, паведамляе РІА “Новости”.

14 сакавіка ў тым самым шпіталі Піначэту зрабілі апэрацыю па замене кардыёстымулятара -- апарату, які стымулюе працу сэрцавай мышцы пры дапамозе рытмічных электраімпульсаў. Апэрацыя цягнулася 1 гадзіну і 45 хвілінаў і прайшла пасьпяхова.

Адзначаецца, што апэрацыя не адносіцца да катэгорыі рызыкаваных, аднак яе ход мог быць ускладнены з улікам узросту пацыента.

Састарэлы генэрал, які кіраваў краінаю 17 гадоў, пакутуе на шматлікія кранічныя захворваньні. Паводле мэдыкаў, “акрамя дыябэту й сардэчных захворваньняў, Піначэт хворы псыхічна”.

Менавіта гэтыя абставіны дазволілі чылійскім судовым органам вызваліць дыктатара ад крымінальнага перасьледу “за злачынствы ваеннай хунты”.