Гарадзенская міліцыя ўмешваецца ў працу газэты :: Хартыя'97 :: Навiны

За публікацыю інфармацыі з афіцыйных прэс-рэлізаў КДБ і УУС, журналіста гарадзенскай недзяржаўнай газэты “Биржа информации” Зьмітра Ягорава абвінавачваюць у раскрыцьці таямніцы сьледзтва. Ліст з патрабаваньнем зьявіцца ў кіраўніцтва Сьледчага камітэту УУС Гарадзенскай вобласьці, падпісанае сьледчым Канстанцінам Сергеем, быў учора атрыманы рэдактарам газэты Аленай Раўбецкай.

-- Я ўспрымаю гэты ліст, як сьведчаньне прававой бязграматнасьці нашых сьледчых, -- пракамэнтаваў дадзены факт газэце “Пагоня” рэдактар “Біржы інфармацыі”.

Сьледчы Сергей патрабуе даслаць яму пэрсанальныя дадзеныя карэспандэнта Зьмітра Ягорава, а таксама зьвесткі, ці мае газэта пісьмовы дазвол сьледзтва на публікацыю дадзеных дазнаньня. Акрамя таго, пад пагрозаю штрафаў, сьледчы патрабуе асабістай яўкі Зьмітра Ягорава ў Сьледчы камітэт.

У тэлефоннай размове з сьледчым Алена Раўбецкая заявіла, што журналіст зьявіцца ў камітэт толькі пасьля таго, як атрымае афіцыйную позву. Больш таго, рэдактар накіравала сьледчаму ліст, у якім папярэдзіла яго аб крымінальнай адказнасьці за ўмяшальніцтва ў справы газэты.