У Менск прыбывае міністар абароны Расеі :: Хартыя'97 :: Навiны

Міністар абароны Расеі Сяргей Іваноў выляцеў у Менск для ўдзелу ў сумеснай Калегіі міністэрстваў абароны Беларусі й Расеі. У цэнтры павесткі дня -- абмеркаваньне першачарговых нарматыўных актаў у сфэры ваеннай інтэграцыі дзьвюх краінаў.

Перад пачаткам калегіі міністры абароны Беларусі й Расеі Леанід Мальцаў і Сяргей Іваноў правядуць закрытую двухбаковую сустрэчу. Чакаецца таксама, што кіраўніка расейскага ваеннага ведамства прыме кіраўнік Беларусі Аляксандар Лукашэнка.

На паседжаньні плянуецца разгледзіць праект канцэпцыі Асноваў заканадаўства “Аб вайсковым абавязку і вайсковай службе”, а таксама праекты першапачатковых нарматыўных прававых актаў саюзнае дзяржавы ў сфэры абароны, вайсковай службы й сацыяльнай абароны вайскоўцаў.
Сумесныя Калегіі міністэрства абароны Расеі й Беларусі праводзяцца пачаргова ў сталіцы кожнай з саюзнай дзяржавы. Папярэдняе паседжаньне адбылося 18 кастрычніка 2002 году ў Маскве. На ім разглядаліся праекты праграмаў, накіраваных на далейшае разьвіцьцё расейска-беларускага й ваенна-тэхнічнага супрацоўніцтва і ўмацаваньне абароназдольнасьці "саюзнай дзяржавы”, у тым ліку па стварэньні Адзінай рэгіянальнай сыстэмы СПА, паведамляе РІА “Новости”.