Рэйтынг Лукашэнкі не падымаецца «вышэй калена» :: Хартыя'97 :: Навiны

“За каго б вы аддалі свой голас, калі б сёньня ў Беларусі праходзілі прэзыдэнцкія выбары?” – з такім пытаньнем зьвярнуліся да жыхароў Мнску сацыёлягі службы “Зеркало” інфармацыйнай кампаніі БелаПАН у час апытаньня, праведзенага 28-30 сакавіка сёлетняга году. Было апытана 500 менчукоў ва ўзросьце 18 гадоў і старэй. Ім прапаноўвалася самім запісаць у анкету кандыдатуру магчымага прэзыдэнта. Толькі 12% рэспандэнтаў заявілі, што гатовыя аддаць свае галасы Аляксандру Лукашэнку (для параўнаньня: у лістападзе 2002 году такіх налічвалася 10%).

1% апытаных прапанавалі кандыдатуру Ўладзімера Ганчарыка – былога старшыні Федэрацыі прафсаюзаў Беларусі, адзінага кандыдата ад дэмакратычных сілаў на апошніх прэзыдэнцкіх выбарах. І каля 1% выбарцаў гатовыя прагаласаваць за лідэра Лібэральна-дэмакратычнай партыі Сяргея Гайдукевіча.

Кандыдатуры іншых магчымых прэтэндэнтаў на пасаду прэзыдэнта Беларусі ў анкету запісваліся радзей. Па 10% апытаных менчукоў ў выпадку прэзыдэнцкіх выбараў гатовыя прагаласаваць супраць усіх кандыдатаў ці ўвогуле не ісьці на выбары. 3 адсоткі рэспандэнтаў пайшлі б на выбары з мэтай сапсаваць бюлетэнь. Большасьць выбарцаў (61%) ня далі зьмястоўных адказаў на прапанаванае пытаньне.

Для параўнаньня: рэйтынг даверу прэзыдэнта Расеі Ўладзімера Пуціна, паводле дадзеных сакавіцкага экспрэс-апытаньня Ўсерасейскага цэнтру дасьледаваньня грамадзкай думкі, праведзенага сярод гараджанаў Расеі, склаў 15%. А рэйтынг ухваленьня ягонай дзейнасьці – 75%.