Беларуская бульба не карыстаецца попытам :: Хартыя'97 :: Навiны

У два разы у параўнаньні зь мінулымі гадамі павялічылася доля прамысловых тавараў зь Беларусі ў таваразвароце Наўгародзкага абласнога спажывецкага таварыства «Аблспажыўзсаюз» -- асноўнага гандлёва-прамысловага прадпрыемства Наўгародзкай вобласьці, якое займае ў розьнічным таваразвароце каля 30 адсоткаў. Устойлівым попытам наўгародцаў сёньня карыстаюцца газавыя пліты берасьцейскага прадпрыемства «Гефест», гадзіньнікі Віцебскага прыборабудаўнічага заводу, беларускі абутак, трыкатаж, швэйныя і шкарпэтна-панчошныя вырабы. Аднак, разам з ростам звароту прамысловых тавараў, зусім на “не” сышлі закупкі наўгародзкімі каапэратарамі беларускай сельгасгаспадарчай прадукцыі.

Вось як карэспандэнту “Союз-инфо” пракамэнтаваў сытуацыю старшыня рады Наўгародзкага “Аблспажыўсаюзу” Станіслаў Садальскі: “Былі часы, калі мы завозілі зь Беларусі да 50 адсоткаў ад неабходнай патрэбы бульбы... У сярэдзіне 90-х гадоў, калі беларускія прадукты жывёлагадоўлі і сельскай гаспадаркі былі канкурэнтаздольнымі, былі ўведзеныя абмежаваньні на вываз іх за межы рэспублікі. Паступова ўсе сувязі спыніліся, а новыя заводзіць нямэтазгодна, бо ўзровень коштаў у Беларусі на сёньня аналягічны коштам мясцовых сельскагаспадарчых вытворцаў, якасьць такая самая, плюс транспартны складнік”.