Свабоду Валеры Леванеўскаму! :: Хартыя'97 :: Навiны

Лідэры прадпрымальніцкага руху Рэспублікі Беларусь выступілі з заяваю адносна затрыманьня і арышту на 15 сутак аднаго зь лідэраў прадпрымальнікаў Валеры Леванеўскага. Нагадаем, што Валеры Леванеўскі быў арыштаваны за ўдзел 12 сакавіка ў Народным маршы «За лепшае жыцьцё!». «Сваімі рэпрэсіямі ўлады яшчэ раз пацьвердзілі посьпех Народнага маршу. Яны спалохаліся аб’яднаньня розных слаёў грамадзтва; спалохаліся сумесных, узгодненых, прадуманых дзеяньняў. Улады прызналі нашую сілу. Нашая сіла – у адзінстве!», -- гаворыцца ў заяве, якую падпісалі старшыня грамадзкага аб’яднаньня «Прыватная ўласнасьць» Леанід Малахаў, намесьнік старшыні Страйкаму прадпрымальнікаў Беларусі Аляксандар Васільеў, старшыня грамадзкага аб’яднаньня «Пэрспэктыва» Анатоль Шумчанка.

Заява лідэраў прадпрымальніцкага руху Рэспублікі Беларусь

1 красавіка ў Менску быў арыштаваны адзін зь лідэраў прадпрымальніцкага руху Беларусі Валеры Леванеўскі. Прычынаю затрыманьня стаў удзел Валерыя ў Народным маршы “За лепшае жыцьцё!” 12 сакавіка 2003 году. Ноч ён правёў у камеры, а на наступны дзень яго даставілі ў суд Савецкага раёну. Судьдзя Казадаеў у чарговы раз прадэманстраваў сваю беспрынцыповасьць і гатоўнасьць выконваць любыя, у тым ліку супрацьзаконныя, указаньні “зьверху”. Судзьдзя Руслан Казадаеў, нягледзечы ні на адзін з аргумэнтаў абароны, прыслухаўся толькі да словаў ілжэсьведак-міліцыянтаў і агучыў прысуд – 15 сутак арышту.

Сваімі рэпрэсіямі ўлады яшчэ раз пацьвердзілі посьпех Народнага маршу 12 сакавіка. Яны спалохаліся аб’яднаньня розных слаёў грамадзтва; спалохаліся сумесных, узгодненых, прадуманых дзеяньняў.

Улады прызналі нашую сілу. Наша сіла – у адзінстве!

Сёньня мы заяўляем – нас ня спыняць рэпрэсіі і запалохваньне! Мы, прадпрымальнікі Беларусі, будзем працягваць сумесныя дзеяньні! Нягледзячы ні на што, мы застанемся разам, і разам даб’емся лепшага жыцьця!

Старшыня РАА “Прыватная ўласнасьць”
Леанід Малахаў

Намесьнік старшыні Страйкаму прадпрымальнікаў Беларусі
Аляксандар Васільеў

Старшыня РАА “Пэрспэктыва”
Анатоль Шумчанка