Прыватызацыя «Белтэлекаму» пачнецца не раней за 2007 год :: Хартыя'97 :: Навiны

Намесьнік міністра сувязі Анатоль Будай заявіў, што ўрад краіны ў 2007 годзе пачне працэс прыватызацыі буйнейшай дзяржаўнай тэлекамунікацыйнай кампаніі “Белтэлекам”. Падштурхнуць улады заявіць аб прыватызацыі дзяржаўнай манаполіі здолела толькі другая заява – аб намеры краіны ўступіць ва Ўсясьветную гандлёвую арганізацыю.

Для гэтага абавязковаю ўмоваю зьяўляюцца скарачэньне долі дзяржавы ў эканоміцы і зьмяншэньне колькасьці дзяржаўных кампаніяў-манапалістаў. А ўсе беларускія інтэрнэт-правайдары па закону абавязаныя перадаваць і атрымоўваць замежны трафік толькі праз “Белтэлекам”, і толькі “Белтэлекам” аказвае такія паслугі. На перамовах, якія праходзілі ў пачатку сёлетняга году ў Жэневе, прадстаўнікі замежных кампаніяў выказалі сваю зацікаўленасьць у інвэстыраваньні ў беларускі камунікацыйны сэктар. Тады бакі дамовіліся лічыць датай пачатку прыватызацыі 2007 год, перадае АФН з спасылкаю на "Компьюленту".

Рэспубліканскае аб’яднаньне “Белтэлекам” было створанае 3 ліпеня 1995 году і сёньня зьўляецца самым буйным прадпрыемствам электрасувязі ў краіне. “Белтэлекам” аказвае практычна ўсе віды паслуг сувязі: тэлефонную, пэйджынгавую, радыёсувязь (сыстэмы “Вілія”, “Алтай”, “Карт”), доступ у інтэрнэт па камутаваных лініях і выдзеленых каналах, вэб-хостынг, арэнду каналаў і г.д. Апорная аптовалаконная сетка кампаніі злучае асноўныя гарады і забясьпечвае выхад у Латвію, Літву, Польшчу, Расею і Ўкраіну. Працягваецца фармаваньне магістральных калец у Магілёўскай, Берасьцейскай і Гомельскай абласьцях.