Пазыка Беларусі «Газпрому» павялічылася :: Хартыя'97 :: Навiны

Запазычанасьць Беларусі перад расейскім ААТ «Газпром» у I кварталі сёлетняга году павялічылася на 20,8 млн. даляраў. Пра гэта, як перадае карэспандэнт «Росбалта», паведаміў міністар энэргетыкі Беларусі Ўладзімер Сямашка ў аўторак на паседжаньні прэзыдыюму Савету міністраў краіны.

Абмеркаваньне тэмы пазык за энэрганосьбіты стала вынікам сустрэчы кіраўнікоў урадаў Расеі й Беларусі Міхаіла Касьянава й Генадзя Навіцкага, якая прайшла 2 красавіка ў Маскве. “На сустрэчы двух прэм’ераў у Расеі Касьянаў зьвярнуў маю ўвагу на тое, што забавязкі Беларусі аплочваць плацяжы не выконваюцца, -- заявіў на паседжаньні прэзыдыюму Генадзь Навіцкі. - Для мяне гэта было навіною”.

Невыкананьне забавязкаў перад “Газпромам” беларускі бок зьвязвае зь недысцыплінаванасьцю ўнутраных спажыўцоў газа, якія, паводле інфармацыі міністра энэргетыкі, “па сакавіку недаплацілі 1 млрд. 880 млн. беларускіх рублёў”. Як паведаміў беларускі міністар, на 1 красавіка агульная запазычанасьць Беларусі за газ перад расейскімі пастаўшчыкамі складае 151,8 млн. даляраў. Уладзімер Сямашка нагадаў, што, згодна распараджэньню прэзыдэнта краіны Аляксандра Лукашэнкі, у 2003 годзе Беларусь намерваецца пагасіць фінансавыя запазычанасьці перад Расеяй за пастаўленыя энэргарэсурсы. У гэтай сувязі ўрад краіны ў апошнія месяцы прыняў шэраг пастановаў аб ліквідацыі пазыкаў унутранымі спажыўцамі расейскага газу. “Гэтыя пастановы ў сваёй масе не выконваюцца”, - падсумаваў міністар энэргетыкі.