Лукашэнка сабраўся ў космас :: Хартыя'97 :: Навiны

Рэспубліка Беларусь будзе інтэграваная ў сусьветную касьмічную прастору. У нас будзе свой нацыянальны касьмічны спадарожнік – такі вынік нарады, якую правёў 8 красавіка Аляксандар Лукашэнка з удзелам беларускіх і расейскіх навукоўцаў.

Кіраўніку дзяржавы прапанавалі на разгляд распрацаваную беларускімі навукоўцамі канцэпцыю стварэньня адзінай сыстэмы дыстанцыйнага зандзіраваньня зямлі. Як паведамілі ў прэс-службе прэзыдэнта, асноўнымі яе элементамі зьяўляюцца стварэньне й запуск на калязямную арбіту штучнага спадарожніка, які дазваляў бы весьці высокадакладныя назіраньні за працэсамі на зямной паверхні, а таксама стварэньне адпаведнай інфраструктуры, якая забясьпечвае прыём і апрацоўку дадзеных з спадарожніка.

У сувязі з складанасьцю праекту ў абмеркаваньні ўдзельнічалі спэцыялісты расейскага Авіякасьмічнага агенцтва, якія цалкам падтрымалі ідэю беларускіх навукоўцаў. Яны таксама выказалі гатоўнасьць прыняць актыўны ўдзел у праекце.

Аляксандар Лукашэнка даручыў ураду і Акадэміі навук краіны неадкладна прыступіць да падрыхтоўкі тэхнічна-эканамічнага абгрунтаваньня стварэньня нацыянальнага касьмічнага спадарожніка й адпаведнай наземнай інфраструктуры. Беларускі лідэр выказаў упэўненасьць, што рэалізацыя касьмічнай праграмы дазволіць ня толькі павысіць прэстыж краіны ў сьвеце, але і дасьць магчымасьць атрымаць вельмі значны эканамічны эфэкт.

Лукашэнка асабліва падкрэсьліў, што Беларусі, нягледзячы на складанасьці перабудовачнага пэрыяду, удалося захаваць і нават па пэўных кірунках разьвіць і павялічыць навукова-канструктарскую вытворчую базу. “Мы в Беларуси ничего не уничтожили”, -- заявіў Лукашэнка.

Усё гэта абсалютна сур’ёзна перадаецца па каналах афіцыйных беларускіх СМІ...