Аб’ём вытворчасьцяў у Беларусі ніжэй за норму :: Хартыя'97 :: Навiны

254 кіраўнікі беларускіх прадпрыемстваў, якія прадстаўляюць асноўныя галіны прамысловасьці й формы ўласнасьці, былі апытаныя ў студзені 2003 году навукоўцамі Навукова-дасьледчага эканамічнага інстытута Міністэрства эканомікі Беларусі. Сацыёлягі вывучалі найбольш важныя паказьнікі працы й пэрспэктывы далейшай дзейнасьці прадпрыемстваў.

Большасьць прадстаўнікоў дырэктарскага корпусу рэспублікі ацанілі “ніжэй нормы” аб’ём сваіх вытворчасьцяў (64%), унутраны попыт на вырабляемую прадукцыю (63%), а таксама запасы сыравіны й матэрыялаў (64%). 44% кіраўнікоў аналягічным чынам ахарактарызавалі экспартны попыт на прадукцыю сваіх прадпрыемстваў. Пры гэтым 41% экспэртаў "вышэй за норму" ацаніў запасы гатовай прадукцыі на складах, перадае БелаПАН. На пытаньне, якія зьмены чакаюцца ў вытворчасьці ў бліжэйшыя два-тры месяцы, большасьць рэспандэнтаў адзначылі магчымую стабілізацыю попыту (51%) на вырабляемую прадукцыю і захаваньне занятасьці людзей на прадпрыемстве (60%). Каля паловы апытаных прагназуюць стабільнасьць аб’ёмаў вытворчасьці (45%) і экспартнага попыту на вырабляемую прадукцыю (43%). У той самы час 55% прадстаўнікоў дырэктарскага корпусу чакаюць у бліжэйшыя два-тры месяцы росту коштаў на прадукцыю сваіх прадпрыемстваў.