Лукашэнку дазволілі ўезд у ЗША і Эўропу :: Хартыя'97 :: Навiны

Адміністрацыя Джорджа Буша разам з 14-ю дзяржавамі-сябрамі ЭЗ прынялі рашэньне адмяніць забарону на выдачу ўязных візаў для вышэйшага кіраўніцтва Беларусі. Пра гэта заявіла прэс-служба Дзярждэпартамэнту ЗША, паводле якой рашэньне аб адмене забароны, якая дзейнічала з канца мінулага году, зьяўляецца адказам на адкрыцьцё Беларусьсю прадстаўніцтва АБСЭ ў Менску і дазвол для гэта арганізацыі “ажыцьцяўляць ейны мандат”. “Мы чакаем, што беларускія ўлады будуць працягваць супрацоўнічаць з АБСЭ і створаць неабходныя ўмовы для бесперашкоднай дзейнасьці”, -- згадваецца ў паведамленьні прэс-службы. Разам з тым, у дакумэнце адзначаецца, што ЗША па-ранейшаму “сур’ёзна занепакоеныя” працяглым пагаршэньнем сытуацыі ў галіне “дэмакратыі і павагі закону ў Беларусі” і заклікаюць Менск праводзіць палітыку “палітычнай лібэралізацыі, паважаць правы чалавека і свабоду СМІ”.

Кіраўнікі МЗС эўрапейскіх краінаў таксама адзначылі, што, паколькі бюро АБСЭ ў Менску аднавіла працу, перадумовы для абвяшчэньня забароны адпалі.

У той самы час Эўразьвяз зноў раскрытыкаваў аўтарытарныя мэтады кіраваньня беларускага лідэра, якія, як гаварылася, прывялі да фальшаваньня вынікаў выбараў у мясцовыя Саветы. Міністры падкрэсьлілі, што для паляпшэньня сувязяў паміж ЭЗ і Менскам неабходны рэальны прагрэс у рэалізацыі дэмакратычных рэформаў у Беларусі.

Забарона на ўезд у 14 краінаў Эўразьвязу для кіраўніцва Беларусі была прынятая ўвосень леташнега году. Гэтая мера стала адказам Эўропы на крокі афіцыйнага Менску па выдаленьні зь Беларусі Кансультатыўна-назіральнай групы АБСЭ. Хутка аналягічныя візавыя санкцыі супраць афіцыйнага Менску прынялі тады і Злучаныя Штаты Амэрыкі. Адным з матываў гэтага рашэньня Вашынгтону сталі зьвесткі аб удзеле Беларусі ў назаконным гандлі зброяй.

Леташні візавы байкот не падтрымала Партугалія, якая старшынявала ў АБСЭ. 31 сьнежня 2002 году была дасягнутая дамоўленасьць аб адкрыцьці ў Беларусі новага офісу АБСЭ. Мандат гэтай арганізацыі ў параўнаньні з Кансультатыўна-назіральнай групай мае больш абмежавальны характар.