Каталікі перарэгістраваліся :: Хартыя'97 :: Навiны

Рымска-каталіцкая царква ў Беларусі прайшла перарэгістрацыю ў адпаведнасьці з новым законам “Аб свабодзе сумленьня й рэлігійных арганізацыях”, паведамляе “Интерфакс”.

Старшыня дзяржкамітэту па справах рэлігіяў і нацыянальнасьцяў Станіслаў Буко ўручыў пасьведчаньне аб рэгістрацыі старшыні Канфэрэнцыі каталіцкіх біскупаў Беларусі кардыналу Казіміру Сьвёнтаку. Акрамя таго, пасьведчаньні аб рэгістрацыі атрымалі кіраўнікі Гарадзенскай і Віцебскай дыяцэзіі Рымска-каталіцкай царквы ў Беларусі.

Кардынал Сьвёнтак адзначыў, што перарэгістрацыя Рымска-каталіцкай царквы сьведчыць аб “узаемаразуменьні дзяржавы й касьцёлу”. Каталіцкая царква “ня лезе ў палітыку, але мы ня можам не цікавіцца жыцьцём, якое адбываецца навокал”, сказаў кардынал.

Пры ўручэньні пасьведчаньняў С.Буко падкрэсьліў, што Рымска-каталіцкая царква зьяўляецца ў краіне другой па колькасьці канфэсіяй пасьля Беларускай праваслаўнай царквы. Паводле яго словаў, каталіцкая царква “зрабіла годны ўнёсак у разьвіцьцё духоўных, культурных і дзяржаўных традыцыяў беларускага народа”. Ён паведаміў, што дзяржава пасьля “доўгага пэрыяду багаборніцтва” перадала беларускім каталікам 299 культавых будынка. На дадзены час Рымска-каталіцкая царква мае 371 будынак, і яшчэ 37 будуюцца. Паводле зьвестак на пачатак сёлетняга году, каталіцкая царква ў краіне мае 432 супольнасьці, пяць рэлігійных аб’яднаньняў, сем місіяў, дзьве духоўныя навучальныя ўстановы.