Хто аддае загады выкрадаць людзей? :: Хартыя'97 :: Навiны

Сваякі Віктара Ганчара і Юры Захаранкі пры судзеяньні намесьніка старшыні Беларускага Гэльсынскага камітэту Гары Паганяйлы зьвярнуліся да кіраўніка Адміністрацыі прэзыдэнта Урала Латыпава, дзяржаўнага сакратара Рады Бясьпекі Генадзя Нявыгласа, старшыні Камітэту дзяржаўнай бясьпекі Леаніда Ерына з просьбаю патлумачыць словы Лукашэнкі, сказаныя ім 27 сакавіка на сэмінары па пытаньнях удасканаленьня ідэалягічнай працы. Кажучы пра былога амбасадара Беларусі ў Японіі Пятра Краўчанку, Лукашэнка заявіў: “Я уже спецслужбам, извините мне мою искренность, даю указания – выкрасть и привезти в страну”.

Родныя зьніклых палітыкаў зьвярнуліся да вышэйшых дзяржаўных чыноўнікаў з просьбаю адказаць на два пытаньні - “На падставе якіх нарматыўных актаў прэзыдэнт Рэспублікі Беларусь надзелены такімі паўнамоцтвамі – даваць загады аб выкраданьні людзей, пазбаўленьні іх свабоды?”, “Ці аддаваліся А.Лукашэнкам раней такія загады спэцслужбам адносна Юры Захаранкі, Віктара Ганчара, Анатоля Красоўскага і Зьмітра Завадзкага?”

“Калі Лукашэнка даваў загады наконт Краўчанкі, то няма ніякіх гарантыяў, што ён не даваў такіх загадаў наконт Юры Захаранкі і Віктара Ганчара”, - заявіла ў інтэрвію БелаПАН жонка зьніклага ў 1999 годзе палітыка В.Ганчара Зінаіда Ганчар.