Андрэй Саньнікаў: Таталітарныя рэжымы ўгаворамі ня зьменіш :: Хартыя'97 :: Навiны

“Адмена ўязных санкцыяў для Лукашэнкі і ягоных чыноўнікаў – гэта чарговая спроба ўгаварыць беларускія ўлады паводзіць сябе “добра”. Яна ні да чаго не прывядзе, бо праблема Беларусі ў самой прыродзе рэжыму Лукашэнкі”, -- лічыць міжнародны каардынатар грамадзянскай ініцыятывы Хартыя’97, былы намесьнік міністра замежных справаў Беларусі Андрэй Саньнікаў. На яго думку, пасьля абвяшчэньня ідэалягічнай вэртыкалі стала канчаткова зразумела, што ў Беларусі завяршаецца стварэньне таталітарнай дзяржавы. “А таталітарныя рэжымы ўгаворамі ня зменіш. Наадварот, існуе небясьпека такімі крокамі ўхваляць узмацненьне рэпрэсіяў супраць апанентаў Лукашэнкі, што і адбываецца кожны раз, калі міжнародная супольнасьць зьмякчае сваё стаўленьне да рэжыму”, - заявіў у інтэрвію прэс-цэнтру Хартыі Андрэй Саньнікаў.

Пры адмене ўязных санкцыяў прадстаўнікі Эўракамісіі спасылаліся на пазытыўныя даклады місіі АБСЭ ў Менску. На думку Саньнікава, падобна на тое, што мы зноў сутыкаемся з праблемаю скажэньня сытуацыі з правамі чалавека й дэмакратыяй у Беларусі. “Што пазытыўнага магла заўважыць місія АБСЭ пасьля прыняцьця шэрагу законаў і дэкрэтаў, якія прыціскаюць правы вернікаў, прадпрымальнікаў, робяць больш жорсткім парадак правядзеньня мітынгаў і дэманстрацыяў, арыштаў мірных дэманстрантаў?”, – кажа дыплямат.

Міжнародны каардынатар Хартыі’97 адзначыў, што нават пасьля адмены візавых санкцыяў у ЭЗ захоўваецца забарона на кантакты з вышэйшымі кіраўнікамі Беларусі. “Спадзяюся, што да гэтых санкцыяў у Эўропе будуць падыходзіць больш сур’ёзна”, -- дадаў палітык.