Расея й Беларусь не гатовыя да валютнага саюзу :: Хартыя'97 :: Навiны

Міжнародны валютны фонд лічыць, што Расеі й Беларусі неабходна яшчэ вельмі шмат зрабіць для пасьпяховага пераходу на адзіную валюту. Пра гэта гаворыцца ў паведамленьні, распаўсюджаным па выніках працы місіі Фонду, якая наведала ў красавіку Менск і Маскву. Справаздача місіі сьведчыць пра тое, што, на думку МВФ, Расея й Беларусь пакуль не гатовыя да валютнага саюзу.

Экспэрты МВФ папярэджваюць, што да пачатку валютнага аб’яднаньня Маскве й Менску неабходна як мінімум вырашыць задачы, пастаўленыя ў іх уласным пляне сумесных дзеяньняў. Трэба таксама дасягнуць згоды па “асноўных інстытуцыйных пытаньнях”, у тым ліку аб адзіным эмісійным цэнтры. Патрабуецца зьблізіць падаткавы рэжым, сыстэмы эканамічнага рэгуляваньня, а таксама збору і аналізу эканамічнай інфармацыі дзьвюх краінаў.

Нарэшце, асаблівая акуратнасьць патрэбная ў “прывязцы” беларускай валюты да расейскай -- каб яна адлюстроўвала рэальную макраэканамічную сытуацыю ў абедзьвюх краінах і не наносіла ім шкоды. Паводле некаторых дадзеных, такая жорсткая прывязка павінна пачаць дзейнічаць з 2004 году. На наступны год расейскі рубель павінен стаць адзінай валютай дзьвюх краінаў, а яшчэ праз 3 гады стварэньне валютнага саюзу павінна цалкам завершыцца.

МВФ падкрэсьлівае, што для пасьпяховага выршэньня задачаў, якія выцякаюць з гэтых плянаў, Беларусі неабходна радыкальна паскорыць і паглыбіць эканамічныя рэформы, зрабіць больш жорсткай фінансава-бюджэтную палітыку.