Колькасьць беспрацоўных беларусаў павялічылася на чвэрць :: Хартыя'97 :: Навiны

На пачатак красавіка 2003 г. на ўліку ў службах занятасьці Беларусі стаяла 145,7 тыс. беспрацоўных, што на 25,8% болей у параўнаньні з аналягічным пэрыядам леташнега году. Як паведамілі ў Міністэрстве працы й сацыяльнай абароны рэспублікі, узровень беспрацоўя ў краіне складае 3,3% да працаздольнага насельніцтва ў праўнаньні з 2,6% летась. Калі ў пачатку сёлетняга году на ўліку стаяла 130,5 тыс. беспрацоўных, то ў пэрыяд з студзеня па сакавік зарэгістравана яшчэ 75,1 тыс. Рост колькасьці беспрацоўных у міністэрстве тлумачаць, у першую чаргу, скарачэньнямі, якія прайшлі ва ўстановах, арганізацыях і на прадпрыемствах Беларусі ў 2002 годзе.

Зараз на адну вакансію прыпадае пяць беспрацоўных, у той час як за аналягічны пэрыяд леташнега году -- чатыры. Пры гэтым найбольшым попытам на рынку працы карыстаюцца будаўнічыя спэцыяльнасьці. Кожны другі беспрацоўны – чалавек ва ўзросьце 30 гадоў, пры гэтым больш за 60% зь ліку тых, хто мае патрэбу ў працаўладкаваньні – жанчыны. Такім чынам сярэднестатыстычны беларускі беспрацоўны -- гэта жанчына ва ўзросьце 30 гадоў, якая мае сярэднюю агульную адукацыю. У пачатку 2002 г. беспрацоўныя з вышэйшай адукацыяй склалі 9,3%, з сярэдняй спэцыяльнай -- 17,4%, з сярэдняй агульнай – 60,6% і без поўнай сярэдняй адукацыі склалі 12,7%.