ЗША падазраваюць Беларусь у продажы зброі краінам-ізгоям :: Хартыя'97 :: Навiны

Злучаныя Штаты крытычна ацэньваюць дачыненьні Беларусі з шэрагам краінаў. Пра гэта сказаў памочнік намесьніка дзяржсакратара ЗША па справах Эўропы і Эўразіі Стывен Пайфэр у часе тэлемосту з Вашынгтону, арганізаванага амэрыканскім дыппрадстаўніцтвам у Менску. «Мы незадаволеныя тым, што ўрад Беларусі падтрымліваў зносіны з рэжымам Садама Хусэйна», -- заявіў Пайфэр. Ён таксама ня выключыў, што Беларусь магла прадаваць узбраеньне ў краіны, у прыватнасьці, у Іран, адносна якіх дзейнічаюць міжнародныя санкцыі. Акрамя таго, ЗША, паводле Пайфэра, занепакоеныя тым, што Беларусь магла прадаваць узбраеньне ў некаторыя краіны Афрыкі, дзе на дадзены час адбываюцца ваенныя канфлікты.

На думку ЗША, Беларусь, як сказаў амэрыканскі дыплямат, “недастаткова адказна падыходзіць да такіх паставак”, ён упікнуў беларускі ўрад у тым, што пастаўкі ў гэтыя краіны ажыцьцяўляюцца “непразрыста”.

Адказваючы на пытаньне журналістаў, ці знойдзеныя ў Іраку доказы беларускіх паставак узбраеньня ў гэтую краіну, Пайфэр сказаў, што кааліцыйныя войскі яшчэ не распачалі пошук зброі, якая б магла быць схаваная іракцамі, паведамляе “Интерфакс”.

“Калі сытуацыя ў рэгіёне стабілізуецца, тады зьявіцца магчымасьць прыкласьці намаганьні па вышуку зброі масавага зьнішчэньня, а таксама дасьледваньня вайсковай тэхнікі, якая знаходзіцца ў Іраку”, - заявіў ён. “Калі мы знойдзем гэтую зброю, тады і паставім перад некаторымі краінамі вельмі няёмкія для іх пытаньні”, -- заявіў дыплямат.

Намесьнік памочніка дзяржсакратара зноў адзначыў, што цяперашнія зносіны Беларусі й ЗША складаныя, а Злучаныя Штаты па-ранейшаму незадаволеныя такім становішчам. Больш за год таму ЗША прапаноўвалі Менску пакрокавую стратэгію для паляпшэньня двухбаковых зносінаў, але так і не пабачылі з боку ўраду Аляксандра Лукашэнкі нейкай гатоўнасьці адказваць на прапанову.

Нягледзячы на нядаўняе рашэньне ліквідаваць візавыя санкцыі супраць Лукашэнкі і яшчэ сямі яго чыноўнікаў, “як ў ЗША, так і ў Эўропе застаецца вялікая занепакоенасьць у сувязі з становішчам з дэмакратычнымі пераўтварэньнямі ў Беларусі”, -- заявіў Стывен Пайфэр і дадаў:

“Мы лічым, што ў Беларусі адбываецца пагаршэньне дэмакратыі, пагаршэньне сытуацыі зь вяршынствам закону. Мы чакаем, што гэтая закляпочанасьць будзе адлюстраваная ў рэзалюцыі, якая, на маю думку, будзе прынятая ў Жэневе Камітэтам ААН па правох чалавека”.

Адказваючы на пытаньне аб пэрспэктывах прыняцьця Кангрэсам ЗША Акта аб дэмакратыі ў Беларусі, Стывен Пайфэр сказаў:

“Акт аб дэмакратыі ў Беларусі мае вялікую падтрымку ў Кангрэсе, якая адлюстроўвае вельмі вялікую занепакоенасьць тым, што Беларусь сваім выбарам, унутранай палітычнай сытуацыяй ізалявала сябе ад Эўропы. Таму мае чаканьні такія: Акт мае вельмі добры шанец прайсьці”.