«Міжнародная амністыя»: беларускія ўлады датычныя да выкраданьня людзей :: Хартыя'97 :: Навiны

Галяндзкае аддзяленне міжнароднай праваабарончай арганізацыі “Міжнародная амністыя” зьвярнулася з адкрытым лістом да Аляксандра Лукашэнкі, у якім у чарговы раз выказала закляпочанасьць праблемаю палітычных зьнікненьняў у Беларусі. Праваабаронцы, у прыватнасьці, нагадалі Лукашэнку пра яго нядаўняе публічнае выказваньне датычнае былога амбасадара Беларусі ў Японіі Пятра Краўчанкі: “Я сказал нашим спецслужбам, простите за откровенность, похитить его и вернуть на родину”. На іх думку, гэтая фраза даказвае датычнасьць вышэйшых службовых асобаў Беларусі да выкраданьня апазыцыянэраў. Прапануем Вашай увазе тэкст ліста цалкам.

Паважаны прэзыдэнт,

У нашай краіне і ва ўсёй Заходняй Эўропе прозьвішча Краўчанкі дастаткова вядомае. Менавіта так звалі чалавека, якія некалькі гадоў пасьля вайны здолеў зьбегчы ад дыктатуры і перасьледу ў Расеі і атрымаў палітычны прытулак за мяжой. Пазьней ён напісаў кнігу “Я выбраў свабоду”.

Я згадаў пра гэты выпадак, калі прачытаў вашыя словыя, якія прагучалі 27 сакавіка, пра беларускага амбасадара ў Японіі з такім самым прозьвішчам: “Я сказал нашим спецслужбам, простите за откровенность, похитить его и вернуть на родину”. Дадзены факт указвае на датычнасьць вышэйшых службовых асобаў Беларусі да выкраданьня Захаранкі, Ганчара, Красоўскага й Завадзкага. Гэтых выпадкаў дастаткова, каб сьвет лічыў урад Беларусі віноўным у тым, што адбылося з гэтымі людзьмі.

Калі гэта праўда, то яны не адзіныя ахвяры дыктата й беззаконства, якое, паводле нашай інфармацыі, характэрна для сёньняшняй Беларусі.

Калі гэта выдумка ворагаў вашай краіны, то чаму б вам не даказаць адваротнае? У гэтым выпадку вам будзе няцяжка дапусьціць да расьсьледваньня сьледчых ААН. У любым выпадку ў вашых сілах разьвеяць сумневы на гэты конт.

З надзеяй на справядлівасьць і дабрабыт вашага народа,

Шчыра ваш,

Ад імя нашай групы

Ван дэр Мэлен

Міжнародная Амністыя

Ноотдорп

Нідэрлянды