Горадня: адрадзілася цэнзура спэктакляў :: Хартыя'97 :: Навiны

Тэатральнае жыцьцё Горадні афарбаванае скандалям. У абласным драматычным тэатры адразу ж пасьля прэм’еры зьнялі з паказу спэктакль “Самотны захад”.

Рашэньне аб сцэнічным жыцьці спэктакля прымае камісія, у склад якой уваходзяць адмыслоўцы з кіраваньня культуры аблвыканкаму. Паводле супрацоўнікаў тэатру, адразу ж пасьля прэм’еры адказныя работнікі з выканкаму прапанавалі рэжысэру ўнесьці ў тэкст карэктывы: цэнзуру не прайшла “народная лексыка”, якую выкарыстоўваюць героі пастаноўкі. Чыноўнік з абласнога кіраваньня культуры Сяргей Давыдзік пацьвердзіў, што паказ спэктаклю спынены, а сам спэктакль “патрабуе дапрацоўкі”, перадае БелаПАН.

Камэнтуючы гэтае рашэньне, рэжысэр спэктаклю Генадзь Мушпэрт адзначыў: “Самотны захад” – гэта драма, але вельмі сьмешная. У кожнай вёсцы, у беларускай у тым ліку, ёсьць сюжэты аб сварках, бойках і забойствах паміж сваякамі. Усё гэта вельмі жыцьцёва і праўдзіва. У маім спэктаклі гучыць народныя лексыка -- не нецэнзурная, а народная, якая гучыць у кожнай вёсцы”.

Аўтар п’есы - ірляндзец Марцін Макдонаг, штатны драматург Лёнданскага каралеўскага тэатру. Макдонаг, паводле гарадзенскага рэжысэра Генадзя Мушперта, - зорка драматургіі, яго п’есы ставяцца сёньня па ўсёй Эўропе і ў Амэрыцы. Генадзь Мушпэрт пазнаёміўся з драматургіяй Макдонага ў час нядаўняй паездкі ў Варшаву.