Місія МВФ ацаніла валютнае аб’яднаньне Расеі й Беларусі :: Хартыя'97 :: Навiны

Місія тэхнічнай дапамогі Кіраваньня па грашова-крэдытных і валютных пытаньнях Міжнароднага валютнага фонду, накіраваная ў Беларусь і Расею для інспэкцыі працэсу стварэньня валютнага саюзу дзьвюх дзяржаваў, завяршыла сваю працу. Па просьбе Нацыянальнага банку Беларусі і Цэнтральнага банку Расеі місія наведала Менск і Маскву, яе прадстаўнікі сустрэліся з высокапастаўленымі чыноўнікамі цэнтральных банкаў, міністэрстваў фінансаў, эканомікі.

Валютны саюз Расеі й Беларусі можа інтэнсыфікаваць гандаль паміж дзьвюма краінамі, лічыць кіраўнік місіі Эн-Мары Гулдэ, начальнік аддзелу аналізу грашова-крэдытнай і валютнай палітыкі МВФ. Але да пачатку працэсу валютнага аб’яднаньня бакі павінны выканаць задачы, прадугледжаныя ва ўзгодненым імі Пляне сумесных дзеяньняў па зьбліжэньні сыстэмаў заканадаўчага рэгуляваньня абодвух бакоў.

Беларускі ўрад, як гаворыцца ў справаздачы аб працы місіі МВФ, прытрымліваецца курса паступовых эканамічных рэформаў. Аднак з улікам увядзеньня ўжо з 1 студзеня 2004 году жорсткай фіксацыі беларускага рубля да расейскага, Беларусі тэрмінова неабходна паскорыць працэсы лібэралізацыі коштаў, заробнай платы, рынку працы, а таксама рэструктурызацыю прадпрыемстваў для забесьпячэньня гібкасьці і канкурэнтаздольнасьці эканомікі.

Пры любых варыянтах стварэньне валютнага саюзу патрабуе ад Беларусі больш інтэнсыўнай рэструктурызацыі фінансавага сэктару і правядзеньня больш глыбокіх інстытуцыйных рэформаў, чым тыя, якія ажыцьцяўляюцца на дадзены час. Улічваючы стан і дынаміку паказчыкаў бюджэту Беларусі, больш жорсткая фіскальная палітыка павінна папярэднічаць манетарнаму аб’яднаньню дзьвюх краінаў. Пра гэта паведамляе ІА “ЭКОПРЕСС”.