У Ірляндыі БАЖ атрымае ўзнагароду :: Хартыя'97 :: Навiны

З 8 па 11 чэрвеня ў Дубліне будзе праходзіць 56-ы штогадовы ўсясьветны газэтны кангрэс, арганізаваны Усясьветнай асацыяцыяй газэтнай журналістыкі (World Association of Newspapers -- WAN). Як мяркуецца, ён зьбярэ больш за тысячы экспэртаў па сродках масавай інфармацыі з усяго сьвету, піша "Irish Examiner".

Паводле Гэвіна О`Рэйлі, старшыні ірляндзкага нацыянальнага газэтнага аб’яднаньня, на кангрэсе будуць разглядацца тэндэнцыі разьвіцьця газэтнай справы больш чым у 60 краінах. Як заявіў прэзыдэнт WAN д-р Сэак Хюн Хонг, форум зьбярэцца ў пэрыяд, калі газэтная справа ва ўсім сьвеце перажывае перамены перад значнымі выклікамі.

Сярод тых, хто выступіць на кангрэсе, называюць аднаго з найбольш вядомых у сьвеце ўладальнікаў СМІ лорда Конрада Блэка, Дзіе Сінглтана, які з сваёй MediaNews Group адраджае ў ЗША газэты, а таксама кіраўніка нямецкай Axel Springer Group Маціяса Допфнэера. Вядомыя журналісты Нік Гауінг зь Бі-бі-сі і Робэрт Фіск зь лёнданскай Independent будуць казаць пра ўплыў, які аказала вайна ў Іраку на журналістыку. Будуць абмяркоўвацца таксама тэмы "Журналістыка пад пагрозаю" і "Інфармацыя ў крызысных і надзвычайных сытуацыях".

Нарэшце, як паведамляе ірляндзкае выданьне, Беларускай асацыяцыі журналістаў будзе ўручана на кангрэсе “Залатое пяро свабоды” за сьмеласьць у супраціве рэпрэсіям адносна СМІ з боку Аляксандра Лукашэнкі. Рашэньне пра гэта было прынятае яшчэ ў лістападзе леташнега году на нарадзе WAN у Маскве. Тады адзначалася што за саракагадовую гісторыю існаваньня “Залатога пяра свабоды” гэта толькі другі выпадак, калі ўзнагарода прысвойваецца арганізацыі, а не асобнаму журналісту. Першы выпадак – узнагарода чэхаславацкай прэсе ў 1969 годзе.