Інтарэсы вытворцаў фанаграмаў будуць ахоўвацца :: Хартыя'97 :: Навiны

Канвэнцыя аб ахове інтарэсаў вытворцаў фанаграмаў, прынятая ў Жэневе 29 кастрычніка 1971 году, у чацьвер набрала моц у Беларусі. Пра гэта на брыфінгу ў Менску паведаміў прэс-сакратар МЗС Беларусі Андрэй Савіных.

Паводле яго, асноўнай мэтаю канвэнцыі зьяўляецца “ўзмацненьне аховы вытворцаў фанаграмаў”. Прыняцьце дадзенага дакумэнту, як адзначыў Савіных, выклікана “масавай неліцэнзаванай вытворчасьцю музычных запісаў на кампакт-касэты і наступнай рэалізацыяй гэтых касэтаў па надзвычай нізкіх коштах. У той самы час легальныя вытворцы не маглі прадаваць сваю прадукцыю па такіх коштах у сувязі з значнымі вытрымкамі на выкананьне студыйнага запісу аўтарскіх ганарараў.

Прадстаўнік беларускага МЗС адзначыў, што для ўступленьня ва Ўсясьветную гандлёвую арганізацыю (УГА) патрабуецца далучэньне да асноўных міжнародных дамоваў па інтэлектуальнай уласнасьці, у тым ліку і Жэнеўскай канвэнцыі. “Такім чынам, далучэньне Беларусі да Канвэнцыі аб ахове інтарэсаў вытворцаў фанаграмаў ад незаконнай вытворчасьці іх фанаграмаў ня толькі будзе садзейнічаць падвышэньню аўтарытэту краіны на міжнародным узроўні як прававой дзяржавы, але адначасова стане значным крокам на шляху далучэньня краіны да УГА”, -- падкрэсьліў Савіных.