У ААН прынятая рэзалюцыя аб парушэньні правоў чалавека ў Беларусі :: Хартыя'97 :: Навiны

17 красавіка ў Жэневе на сэсіі Камісіі ААН па правох чалавека была прынятая рэзалюцыя аб парушэньні правоў чалавека ў Беларусі. Гэтая рэзалюцыя ўпершыню вынесеная на абмеркаваньне ў самым аўтарытэтным органе міжнароднай супольнасьці, і адразу ж атрымала падтрымку большасьці чальцоў Камісіі. За прыняцьце рэзалюцыі прагаласавалі 23 дзяржавы, 14 былі супраць, 16 ўстрымаліся. «Прыняцьце рэзалюцыі Камісіяй ААН па правох чалавека ў Беларусі будзе мець вельмі сур’ёзныя наступствы, ня толькі палітычныя, але і эканамічныя. Урады дэмакратычных краінаў будуць абавязаныя ўлічваць гэтую рэзалюцыю ў сваіх адносінах зь Беларусьсю. Улічваць яе будуць і міжнародныя арганізацыі, у тым ліку фінансавыя й эканамічныя. Рэзалюцыя прадугледжвае дастаткова сур’ёзныя механізмы для кантролю за сытуацыяй з правамі чалавека ў Беларусі, уключаючы механізмы адмысловых дакладчыкаў ААН», – лічыць міжнародны каардынатар грамадзянскай ініцыятывы Хартыя’97, былы намесьнік міністра замежных справаў Андрэй Саньнікаў.

Як заявіў дыплямат у інтэрвію прэс-цэнтру Хартыі, прыняцьце рэзалюцыі па сытуацыі з правамі чалавека ў Беларусі – гэта вельмі сур’ёзны крок міжнароднай супольнасьці, бо Камісія ААН па правох чалавека зьяўляецца самым аўтарытэтным органам па гэтых пытаньнях. На яго думку, аналіз вынікаў галасаваньня па рэзалюцыі паказвае, што ў дадзеным выпадку не абыйшлося без згоды Расеі на прыняцьце гэтага дакумэнту.

Акрамя таго, Андрэй Саньнікаў адзначыў, што галасаваньне па Беларусі аналягічнае галасаваньню па рэзалюцыі аб сытуацыі з правамі чалавека ў Туркмэністане. Гэта, паводле яго, сьведчыць пра тое, наколькі сур’ёзна сусьветная супольнасьць ставіцца да прыняцьця такой рэзылюцыі (у Жэневу адмыслова з гэтай мэтай былі накіраваныя памочнік Лукашэнкі Ляшчэня і намесьнік міністра замежных справаў Сычоў), Камісія вырашыла, што сытуацыя з правамі чалавека ў Беларусі настолькі пагоршылася, што неабходна прымаць рэзалюцыю па Беларусі”, -- заявіў міжнародны каардынатар Хартыі’97.

Андрэй Саньнікаў таксама адзначыў, што асноўную ролю ў прыняцьці рэзалюцыі адыгралі Злучаныя Штаты Амэрыкі і, перш за ўсё, амбасада ЗША ў Менску.

Тэкст рэзалюцыі можна будзе прачытаць на нашым сайце.