Лукашэнка -- частка тэрарыстычнай «восі зла» :: Хартыя'97 :: Навiны

“Знойдзены ў Багдадзе дакумэнт – гэта пацьверджаньне інфармацыі зь сусветнай прэсы аб сувязях у ваеннай сфэры рэжыму Лукашэнкі і рэжыму Хусэйна. Думаю, гэта не апошняе пацьверджаньне такіх сувязяў. Можна чакаць, што зьявяцца сьведчаньні і аб датычнасьці беларускіх уладаў да распрацовак зброі масавага забойства. Дадзены факт пацьвердзіў і тое, што рэжым Лукашэнкі парушаў санкцыі ААН на пастаўкі ўзбраеньня, тэхнікі падвойнага прызначэньня ў Ірак. У сваю чаргу гэта можа пацягнуць меры ў адказ ня толькі з боку ААН, але і з боку антытэрарыстычнай кааліцыі, бо гэты факт пацьвердзіў, што Лукашэнка ня толькі апошні дыктатар Эўропы, але і частка тэрарыстычнай “восі зла”, -- лічыць міжнародны каардынатар грамадзянскай ініцыятывы Хартыя’97, былы намесьнік міністра замежных справаў Беларусі Андрэй Саньнікаў.

Як вядома, днямі ў Багдадзе быў знойдзены дакумэнт, які пацьвярджае наяўнасьць ваенных кантактаў паміж рэжымам Лукашэнкі і рэжымам Садама Хусэйна. Карэспандэнт Радыё Свабода Рон Сынавец знайшоў у сэйфе высокапастаўленага ірацкага афіцэра на базе ірацкай нацыянальнай гвардыі на поўдні Багдаду факс на блянку Барысаўскага 140-га рамонтнага завода, які падпарадкоўваецца Міністэрству абароны Рэспублікі Беларусь. Дакумэнт датаваны 16 чэрвеня 2001 году і мае сыходзячы нумар 1726. У беларускім лісьце размова ідзе аб усталяваньні зброі і рамонце вайсковай тэхнікі, якая была пашкоджаная ў час вайны ў Пэрсыдзкай затоцы ў 1991 годзе.