Валерыя Шчукіна спрабуюць выселіць з Полацку :: Хартыя'97 :: Навiны

Віцебская абласная судовая калегія ўчора разглядала пытаньне аб месцы жыхарства і прапісцы вядомага апазыцыянэра. У час падрыхтоўкі да мясцовых выбараў Шчукіну было загадана выселіцца з інтэрнату Полацкага аграэканамічнага каледжу, дзе ён прапісаны апошнія сем гадоў.

Валеры Шчукін ня згодны з рашэньнем Полацкага гарадзкога суда, які пастанавіў, што ён павінен выселіцца з інтэрнату. Сваё высяленьне Шчукін зьвязвае з сваёй палітычнай дзейнасьцю, і ў прыватнасьці, за удзел у кампаніі па выбарах у мясцовыя Саветы, калі ён балятаваўся ў дэпутаты Полацкага гарсавету.

У той самы дзень, як Валеры Шчукін падаў быў заяву пра рэгістрацыю сваёй ініцыятыўнай групы, ягоны патэнцыйны супернік, дырэктар агратэхнічнага каледжу Ўладзімер Дзюбо падаў заяву ў суд з мэтаю выселіць канкурэнта з падведамаснага інтэрнату. І суд задаволіў ягоную скаргу, прызнаўшы сам факт засяленьня апазыцыянэра ў полацкі інтэрнат незаконным.

Дарэчы, у гэтым інтэрнаце спадар Шчукін прапісаўся 7 гадоў таму, калі ён быў абраны дэпутатам Вярхоўнага Савету 13-га скліканьня ды пажадаў быць бліжэй да сваіх выбарцаў. З тае пары сваю палітычную дзейнасьць ён зьвязвае з гэтым горадам, і намеры выселіць яго ды пазбавіць полацкай прапіскі лічыць сьвядомым жаданьнем уладаў пазбавіцца і ад яго самога.

“Я не ўваходжу ні ў адну партыю, і таму балятавацца вымушаны выключна па месцы жыхарства. А па месцы жыхарства, у Полацку, чалавек, які мае значны палітычны досьвед, уладам не патрэбны. І таму яны робяць усе захады, каб выселіць мяне з Полацку”, -- сказаў Шчукін ў інтэрвію Радыё Свабода.

Абласная судовая калегія, адрозна ад Полацкага гарадзкога суду, не прыняла ўчора адназначнага рашэньня. Справа Валерыя Шчукіна будзе дасьледаваная ды канчатковы вырак будзе пазьней.