За мараль памежнікаў будзе адказваць «настоящий» палкоўнік :: Хартыя'97 :: Навiны

У Дзяржаўным камітэце памежных войскаў Беларусі створаны дэпартамэнт маральна-псыхалягічнага забесьпячэньня і падрыхтоўкі войскаў. Яго дырэктарам загадам Дзяржкамітэту прызначаны палкоўнік Віктар Бутранец.

Як паведамляе БелаПАН, В.Бутранец нарадзіўся 16 лютага 1957 году ў вёсцы Малое Жажліно Лепельскага раёну Віцебскай вобласьці. Тэрміновую службу праходзіў ва Ўзброеных сілах СССР. Пасьля сканчэньня ў 1980 годзе Сьвярдлоўскай вышэйшай ваенна-палітычнай танкава-артылерыйскай вучэльні паступіў на службу ў паветрана-дэсантныя войскі. Прайшоў пасады ад намесьніка камандзіра парашутна-дэсантнай роты па палітчастцы да начальніка аддзяленьня мабілізацыі і камплектацыі – намесьніка начальніка штаба парашутна-дэсантнага палка. У 1993 годзе В.Бутранец скончыў Гуманітарную акадэмію Ўзброеных сілаў Расейскай Фэдэрацыі. У 1997 годзе пасьля прызыву для прахаджэньня далейшай службы ў памежных войсках Рэспублікі Беларусь быў прызначаны намесьнікам камэнданта па працы з асабістым складам Полацкага памежнага атраду. З жніўня 1997 году па студзень 1998 году быў намесьнікам начальніка Лідзкага памежатраду па падрыхтоўцы і выхаваньні асабістага складу. Затым быў прызначаны намесьнікам начальніка атраду – начальнікам аддзелу падрыхтоўкі і выхаваньня асабістага складу Полацкага памежнага атраду. З сакавіка 1999 году па сакавік 2003 году В.Бутранец камандаваў Гомельскім памежатрадам. Узнагароджаны медалямі "За баявыя заслугі", "За бездакорную службу" першай ступені, "За адзнаку ў ахове дзяржаўнай мяжы".