Наёмнікі, гэць! :: Хартыя'97 :: Навiны

Украіна й Беларусь па-рознаму ставяцца да таго, што іх грамадзяне змогуць служыць у расейскім войску.

Супрацоўнік украінскай пракуратуры Юры Бойчанка цытаваў Крымінальны кодэкс. Паводле яго, генэральная пракуратура Ўкраіны мае права распачынаць крымінальныя справы ў выпадку “вярбоўкі, фінансаваньня, матэрыяльнага забесьпячэньня, навучаньня наёмнікаў з мэтай выкарыстаньня ва ўзброеных канфліктах іншых дзяржаваў ці гвалтоўных дзеяньняў, накіраваных на зьвяржэньне дзяржаўнай улады ці парушэньня тэрытарыяльнай цэласнасьці, а таксама выкарыстаньня наёмнікаў у ваенных канфліктах ці дзеяньнях”. За парушэньне гэтага артыкулу прадугледжана крымінальнае пакараньне ад 3 да 8 гадоў. А за “ўдзел без дазволу адпаведных органаў дзяржаўнай улады ва ўзброеных канфліктах іншых дзяржаваў з мэтай атрыманьня матэрыяльнай узнагароды” пагражае ад 5 да 10 гадоў. Дзеяньне гэтых артыкулаў ня будзе распаўсюджвацца на грамадзянаў Украіны толькі ў тым выпадку, калі Вярхоўная Рада прыме адпаведнае рашэньне адносна міжнароднага ўзаемадзеяньня ў сфэры абароны, дадаў Юры Бойчанка.

Рыгор Амельчанка, кіраўнік Зьвязу афіцэраў і народны дэпутат Украіны ад Блёку Юліі Цімашэнкі заявіў, што такога рашэньня Рада не прыме. “Як бы адрэагавалі расейскія палітыкі, -- пацікавіўся сп.Амельчанка, -- калі б амэрыканскі сэнат ці нямецкі бундэстаг прапанаваў расейскім вайскоўцам служыць у іх войску і паабяцаў у пэрспэктыве магчымасьць атрымаць грамадзянства?”

Затое ў Беларусі да навіны паставіліся куды больш спакойна. Начальнік прэс-службы Мінабароны Беларусі палкоўнік Леанід Захаранка заявіў, што гэтае рашэньне ўраду Расеі дазволіць заклікаць у расейскае войска тых грамадзянаў СНД, якія стала пражываюць на расейскай тэрыторыі, але пакуль ня маюць грамадзянства.

Начальнік кіраваньня кадраў абароннага ведамства Беларусі Юры Меранцоў лічыць, што ні ў адным законе нічога не гаворыцца пра тое, ці дазволена беларускім грамадзянам паступаць на службу ў замежнае, у тым ліку расейскае, войска.

У той самы час ў Маскве прадбачылі, што ў сталіцах Садружнасьці рэакцыя будзе нэрвовай. “Вядома, яны будуць вапіць, -- заявіў газэце “Время новостей” высокапастаўлены прадстаўнік Мінабароны, -- але гэта іх праблемы”.