Грамадзянін Беларусі ня зможа служыць у Расеі :: Хартыя'97 :: Навiны

Напярэдадні саміту ў рамках ДКБ у Душанбэ расейскі ўрад ухваліў прапановы міністра абароны Сяргея Іванова прымаць на службу ў расейскае войска грамадзянаў СНД. Пасьля трохгадовай службы ў расейскіх узброеных сілах кантрактнікі-замежнікі змогуць атрымаць расейскае грамадзянства. Такое сьцверджаньне распаўсюджваецца і на грамадзянаў Беларусі.

Як паведамляе Радыё Свабода, некаторыя прадстаўнікі афіцыйнага Менску пазытыўна адрэагавалі на гэтую навіну. Старшыня камісіі па нацыянальнай бясьпецы “палаты прадстаўнікоў” Барыс Бікінін заявіў, што ў Беларусі пасьля рэфармаваньня войску сталі незапатрабаванымі высокаклясныя адмыслоўцы, напрыклад, у ваенна-касьмічнай галіне. На яго думку, расейскае новаўвядзеньне дазволіць найбольш поўна рэалізаваць беларускі патэнцыял.

У той самы час у беларускім Міністэрстве абароны вельмі заблытана камэнтуюць сытуацыю з грамадзянствам тых, хто пажадае падпісаць кантракт у Расеі. Аднак арт.19 Закону аб грамадзянстве РБ вызначае, што грамадзянства Рэспублікі Беларусь страчваецца ў выніку паступленьня чалавека на вайсковую службу іншай дзяржавы. Гэтае сьцьверджаньне тычыцца і Расеі, пацьвердзілі ў пашпартна-візавай службе МУС РБ. Больш за тое, беларускага грамадзянства чалавек пазбаўляецца і ў тым выпадку, калі паступае за мяжой на службу ў органы міліцыі, юстыцыі, бясьпекі. Такім чынам, беларус можа пазбавіцца свайго грамадзянства адразу, а новае атрымаць – толькі праз тры гады.