Амбасадар Францыі сустрэўся з асуджанымі журналістамі :: Хартыя'97 :: Навiны

Амбасадар Францыі ў Беларусі Стэфан Шмялеўскі сустрэўся з гарадзенскімі журналістамі Паўлам Мажэйкам і Мікалаем Маркевічам, асуджаным нібыта за паклёп на Аляксандра Лукашэнку. Сустрэча адбылася вечарам 28 красавіка ў рамках двухдзённага візыту Стэфана Шмялеўскага ў Гарадзенскую вобласьць і цягнулася каля гадзіны. Амбасадар падкрэсьліў, што размова з журналістамі праходзіць у рамках інструкцыяў, якія ён атрымаў ад свайго ўраду, і што адна зь ягоных місіяў у Беларусі -- сачыць за сытуацыяй у галіне захаваньня правоў чалавека й свабоды слова.

Мажэйку і Маркевіча дыплямат назваў найбольш яскравымі пэрсонамі, якія пацярпелі ад беззаконства ўладаў. “Амбасадар Францыі выказаў салідарнасьць з намі. Гэта для нас вялікая маральная падтрымка, гэта значыць, што Эўропа, Францыя, французскае грамадзтва не адступаюць ад дэмакратычных прынцыпаў”, -- пракамэнтваў БелаПАН сустрэчу Павал Мажэйка.

У час візыту ў Гарадзенскую вобласьць, які пачаўся 28 красавіка, Стэфан Шмялеўскі сустрэўся з старшынямі аблвыканкаму й гарвыканкаму Ўладзімерам Саўчанкам і Аляксандрам Антаненкам, з выкладчыкамі й студэнтамі Гарадзенскага дзяржаўнага ўнівэрсытэту. У час сустрэчы з Уладзімерам Саўчанкам амбасадар падняў пытаньне аб парэштках людзей, захаваных на габрэйскіх могілках, якія былі знойдзеныя нядаўна ў час рэканструкцыі стадыёну ў Горадні. Амбасадар заявіў, што такое стаўленьне да памяці – недапушчальнае.