«БДГ» атрымала другое запар папярэджаньне :: Хартыя'97 :: Навiны

Міністар інфармацыі Рэспублікі Беларусь Міхаіл Падгайны паведаміў, што ім падпісанае чарговае папярэджаньне аднаму з найбуйнейшых незалежных выданьняў — «Белорусской деловой газете». У рэдакцыі зьвязваюць ціск на газэту з апошняй ідэалягічнай нарадай у А.Лукашэнкі і жаданьнем уладаў запалохаць журналістаў.

Першае папярджаньне «БДГ» атрымала за паведамленьне пра тое, што на пахаваньні былога паплечніка А.Лукашэнкі і экс-міністра транспарту Аляксандра Лукашова, які скончыў жыцьцё самагубствам, не было цяперашняга міністра Міхаіла Баравога. Апошні давёў у лісьце ў Мінінфармацыі, што на пахаваньні быў.

Другое папярэджаньне Міністэрства інфармацыі вынесла “БДГ” за перадрук з расейскай прэсы паведамленьня пра тое, што А.Лукашэнка даў свой пэрсанальны самалёт для таго, каб "міс Расеі" Сьвятлана Каралёва, якая была ў журы на леташнім конкурсе “Міс Беларусь”, змагла вярнуцца ў Маскву.

Кіраўнік Цэнтру прававой дапамогі СМІ вядомы юрыст Міхаіл Пастухоў лічыць гэтыя папярэджаньні ціскам на незалежную прэсу за крытычныя матэрыялы і кажа, што папярэджаньні могуць мець сур’ёзныя наступствы:

-- Фактычна Міністэрства інфармацыі пасьля вынясеньня двух папярэджаньняў мае фармальныя падставы для пастаноўкі пытаньня аб закрыцьці газэты ў судовым парадку. Тое, што ўлада не задаволеная выступленьнямі незалежных выданьняў — відавочна.

Галоўны рэдактар “БДГ” Пётар Марцаў упэўнены, што пакуль гэтыя папярэджаньні, паводле закону аб СМІ, не пагражаюць выхаду ягонай газэты. І прынамсі першае зь іх — папярэджаньне за публікацыю пра Лукашова — “Белоруская деловая газета” будзе аспрэчваць. Паводле Пятра Марцава, газэта мае пяць сьведкаў на карысьць праўдзівасьці сваёй публікацыі.

-- Такая задача — разабрацца з газэтай — стаіць ужо даўно, і, як заўсёды, у чыноўніцкім сьвеце робяцца такія спробы ў выглядзе кампаніі. Цяпер чарговая кампанія. Гэта, відаць, наступства ідэалягічнай нарады, дзе паводле нашай інфармацыі, прэзыдэнт абураўся нашай газэтай. Пасьля гэтага начальнік галоўнага прававога ўпраўленьня адміністрацыі пабываў у Мінінфармацыі. І вось цяпер барацьба ідзе па ўсіх франтах, паведаміў Радыё Свабода Пётар Марцаў.