Звольнены за палітыку :: Хартыя'97 :: Навiны

30 красавіка ў сувязі з грамадзка-палітычнай дзейнасьцю і ўдзелам у выбарах у мясцовыя Саветы звольнены з працы прадстаўнік праваабарончага цэнтру “Вясна” ў Наваполацку Зьміцер Салаўёў.

Да 30 красавіка Зьміцер Салаўёў зьяўляўся супрацоўнікаў навукова-дасьледніцкага сэктара Полацкага дзяржаўнага ўнівэрсытэту.

“Афіцыйна ў загадзе напісана, што я звольнены з працы “ў сувязі з завяршэньнем тэрміну кантракту”, але гэта проста фармальная падстава, бо мы заўсёды працавалі па кантракце, кантракты падаўжаліся. Так я працаваў пасьля сканчэньня асьпірантуры ў 1999 годзе. Сапраўднай падставаю для майго звальненьня было тое, што ў час выбараў у мясцовыя Саветы я быў кандыдатам у дэпутаты Віцебскага абласнога Савету па той самай акрузе, што і прарэктар нашага ўнівэрсытэту Хведар Панцелеенка. Я ўтварыў яму канкурэнцыю ў сакавіку 2003 году. Яшчэ ў 2000 годзе ў час выбараў у “палату прадстаўнікоў” Панцелеенка быў старшынём камісіі на ўчастку №9, а я быў назіральнікам ад праваабарончага цэнтру “Вясна” і выявіў фальсыфікацыі на гэтым участку. Адпаведныя паперы я накіраваў у пракуратуру. З пракуратуры адказалі: “рэкамэндуецца прызнаць вынікі на ўчастку №9 несапраўднымі. Такім чынам, канфлікт з прарэктарам у нас зацяжны”, -- паведаміў супрацоўнікам інфармацыйнага аддзелу ПЦ “Вясна” Зьміцер Салаўёў.