Буш аб’явіў аб сканчэньні вайны ў Іраку :: Хартыя'97 :: Навiны

Прэзыдэнт ЗША Джордж Буш, выступаючы на палубе авіяносца Abraham Lincoln, аб’явіў аб сканчэньні вайны ў Іраку. Паводле яго, “асноўныя буйныя ваенныя апэрацыі ў Іраку завершаныя”, і зараз трэба заняцца рэканструкцыяй і аднаўленьнем. Авіяносец гэты прымаў удзел у вайне, і знаходзіцца зараз у Ціхім акіяне ў некалькіх дзясятках кілёмэтрах ад ўзьбярэжжа штату Каліфорнія.

“Мае суайчыньнікі, асноўныя буйныя ваеныя апэрацыі ў Іраку завершаныя, і мы, і нашыя хаўрусьнікі атрымалі посьпех у гэтай вайне. Зараз нашыя войскі займаюцца забесьпячэньнем бясьпекі ў гэтай краіне”, -- сказаў прэзыдэнт ЗША.

Зрэшты, аб перамозе войскаў кааліцыі прэыздэнт не аб’явіў, адзначае ВВС. У адпаведнасьці з Жэнеўскімі канвэнцыямі, з абвяшчэньнем аб спыненьні вайны войска пераможцаў абавязанае вызваліць ваеннапалонных і спыніць любыя апэрацыі, накіраваныя супраць лідэраў пераможанага боку. Да гэтага пакуль далёка.

“Тыран паў і Ірак вольны, -- кажа Буш. -- Аднак перад кааліцыяй стаіць “складаная праца”. І ня толькі па аднаўленьні краіны. “Мы працягваем пошукі зброі, перасьледуем лідэраў і сочым за парадкам у Іраку”, -- апісаў цяперашнія функцыі войскаў кааліцыі Буш. “Мы пачалі пошук схаванай хімічнай і біялягічнай зброі, і нам ужо вядома аб сотнях аб’ектаў, якія будуць дасьледаваныя”, -- сказаў пры гэтым амэрыканскі лідэр. Праўда, зброі знайсьці пакуль не ўдалося.

Буш, акрамя таго, пацьвердзіў, што “пераход ад дыктатуры да дэмакратыі зойме час, і на гэты час нашая кааліцыя застанецца ў Іраку. Затым мы сыдзем і пакінем свабодны Ірак”.

Жаўнераў і маракоў Буш падзякаваў за “добра выкананую працу”. “Нашае войска за ўсю сваю гістрыю ў буйнейшых бітвах прадэманстравала веру ў ідэялы. Я ганаруся, што зьяўляюся галоўнакамандуючым гэтага войска”, - цытуе Буша “Интерфакс”.

На яго думку, “вызваленьне Ірака стала асноўным дасягненьнем” у барацьбе зь міжнародным тэрарызмам. “Мы прыбралі хаўрусьніка групоўкі “Аль-Кайда” і ліквідавалі крыніцу фінансаваньня тэрарыстаў, -- заявіў Буш. – Ніводная тэрарыстычная сетка не атрымае зброю масавага забойства ад ірацкага рэжыму, бо гэтага рэжыму больш не існуе”.

Як раней паведамляў NEWSru.com., камандуючы амэрыканскімі войскамі ў час вайны ў Іраку генэрал Томі Фрэнкс праінфармаваў прэзыдэнта ЗША Джорджа Буша, што галоўныя ваенныя апэрацыі завяршыліся.