МВФ заклікае Беларусь зьнізіць інфляцыю :: Хартыя'97 :: Навiны

Выканаўчая рада дырэктараў Міжнароднага валютнага фонду (МВФ) лічыць, што цяперашняя эканамічная палітыка Беларусі не адпавядае плянам жорсткай фіксацыі беларускага рубля да расейскага рубля. Такая адна з высноваў, якая ўтрымліваецца ў інфармацыйным паведамленьні для грамадзкасьці, распаўсюджаным па выніках разгляду выканаўчай радай дырэктараў МВФ штогадовай справаздачы аб эканамічнай сытуацыі ў Беларусі, паведамляе БелаПАН. Дырэктары, у прыватнасьці, адзначылі, што макраэканамічная палітыка Беларусі павінна адпавядаць рэжыму абменнага курсу і што абменны курс мусіць быць дастаткова канкурэтназдольным на момант ягонай фіксацыі да расейскага рубля. У гэтай сувязі большасьць дырэктараў МВФ пагадзіліся з тым, што на дадзены час курс беларускага рубля завышаны, і заклікалі да зьніжэньня інфляцыі паскоранымі тэмпамі.

Кіраўніцтва МВФ настойліва рэкамэндуе зрабіць больш жорсткай грашова-крэдытную і падаткава-бюджэтную палітыку. У галіне падаткава-бюджэтнай палітыкі МВФ асабліва адзначае неабходнасьць рацыяналізацыі выдаткаў, прымаючы на ўвагу адносна вялікі памер сэктару дзяржаўнага кіраваньня. Кіраўніцтва МВФ парэкамэндавала скараціць субсідзіраваньне сельскай гаспадаркі, жыльлёвага будаўніцтва й будаўніцтва дарог, скараціць бюджэтныя суды і неадкладна ліквідаваць фінансаваньне дэфіцыту бюджэту ўраду Нацыянальным банкам. Выканаўчая рада дырэктараў таксама заклікала беларускія ўлады павысіць бюджэтную празрыстасьць.