Школьнікаў прымушаюць уступаць у БРСМ :: Хартыя'97 :: Навiны

За апошнія тры тыдні колькасьць сябраў Баранавіцкай арганізацыі грамадзкага аб’яднаньня “Беларускі рэспубліканскі саюз моладзі” (БРСМ) вырасла больш чым у сем разоў. Як паведаміла БелаПАН старшыня рэгіянальнай арганізацыі БРСМ Алена Клішэўская, “гэта -- вынік агітацыйнай працы, якая праводзілася інфармацыйнымі групамі БРМ у школах”. Аднак вучні і іх бацькі сьцьвярджаюць адваротнае.

“У нашай школе ідзе моцная агітацыя за ўступленьне ў БРСМ. Я не хачу станавіцца сябрам гэтай арганізацыі, але настаўнікі адкрыта кажуць, што тым, хто не ўступіць у БРСМ, будзе складаней здаваць экзамены, -- паведаміў выпускнік адной зь мясцовых школаў Зьміцер, які не пажадаў назваць сваё прозьвішча. -- Многія хлопцы й дзяўчаты баяцца нізкіх балаў і вымушаныя станавіцца сябрамі арганізацыі насуперак сваёй волі”.

Бацькі, у сваю чаргу, занепакоеныя тым, што іх дзецям ніхто нават не тлумачыць, якія мэты й задачы ставіць гэтая арганізацыя. “Напэўна, у БРСМ ёсьць нямала добрага, -- дапускае Віктар Іванаў, бацька аднаго з баранавіцкіх школьнікаў, -- і я, хутчэй за ўсё, ня быў бы супраць уступленьня дзіцёнка ў гэтую арганізацыю, калі б яе лідэры сумленна патлумачылі, што БРСМ фінансуецца з прэзыдэнцкага фонду і таму будзе падпарадкоўвацца непасрэдна кіраўніку дзяржавы. Прадстаўнікі “Маладога Фронту” ці “Зубра”, напрыклад, распавядаюць пра сваю палітычную скіраванасьць. А ў дадзеным выпадку атрымоўваецца, што нашых дзяцей пазбавілі права выбару і падманным шляхам навязалі сяброўства ў зьвязе моладзі. Ці інфармацыя аб сяброўстве ў гэтай арганізацыі, як калісьці інфармацыя аб сяброўстве ў камсамоле, будзе заносіцца ў асабістыя справы?”

Многія дырэктары школаў, у якіх зараз ідзе ўзмоцненая агітацыя за ўступленьне ў РСМ, глядзяць на тое, што адбываецца, спакойна. Так, напрыклад, дырэктар гімназіі №3 Уладзімер Разумовіч лічыць, што калі альтэрнатывы гэтай арганізацыі няма, то “няхай будзе хоць БРСМ”.

А дырэктар школы №14 Мікалай Руды настроены скептычна: "Усё, што ствараецца гвалтоўным шляхам, доўга не пражыве".