Ствараецца «жоўты» прамысловы прафсаюз :: Хартыя'97 :: Навiны

Рашэньне аб стварэньні прафсаюзу работнікаў прамысловасьці ў складзе Фэдэрацыі прафсаюзаў Беларусі (ФПБ) прынята 7 траўня, на паседжаньні арганізацыйнага камітэту ў Менску. Устаноўчы зьезд па стварэньні прафсаюзу работнікаў прамысловасьці адбудзецца 28 траўня. Мяркуецца, што ў склад новага аб’яднаньня ўвойдуць прадстаўнікі зарэгістраваных Міністэрствам юстыцыі прафсаюзаў дзесяці буйных беларускіх прадпрыемстваў: Менскага аўтамабільнага, Беларускага металургічнага, Рэчыцкага метызнага заводаў і іншых.

“Не бяруся меркаваць аб усіх прафсаюзных арганізацыях, якія сабраліся ствараць “адзіны моцны” прафсаюз работнікаў прамысловасьці. Але, думаю, што многія ініцыятары падобныя на прафсаюз работнікаў Менскага аўтамабільнага заводу – несамастойную арганізацыю, якая фармальна мае прызнакі прафсаюзу, а па сутнасьці цалкам залежыць ад адміністрацыі”, -- сказаў у інтэрвію сайту www.praca.by старшыня свабоднага прафсаюзу металістаў Уладзімер Другакоў. На думку лідэра СПМ, зноў створаны прафсаюз работнікаў прамысловасьці “будзе такой сама бязвольнай і будзе цалкам залежыць ад наймальніка і ўладаў арганізацыяй, як і прафсаюз МАЗу”. “Уся гэтая задума для таго, каб прыбраць няўгодных прафсаюзных лідэраў Бухвостава й Федыніча”, -- лічыць Уладзімер Другакоў.