Інваліды-калясачнікі пратэстуюць супраць ушчамленьня сваіх правоў :: Хартыя'97 :: Навiны

Каля 20-ці інвалідаў-калясачнікаў у панядзелак у Мнску правялі мітынг супраць “ушчамленьня правоў грамадзянаў Беларусі, вымушаных перасоўвацца пры дапамозе інваліднай каляскі”. Акцыю наладзіла грамадзкае аб’яднаньне “Рэспубліканская асацыяцыя інвалідаў-калясачнікаў” (РАІК). Кіраўніцтва Менгарвыканкаму забараніла інвалідам правесьці мітынг на плошчы Якуба Коласа і адправіла іх у парк Дружбы народаў. Аднак людзі адмовіліся ісьці на Бангалор, і проста праехаліся ў калясках уздоўж парку з плякатамі: “Прэзыдэнт, калі пачнуць працаваць нашыя законы?”, “Дзяржава, інваліды ў цябе ёсьць”, “Мы таксама людзі і жадаем жыць”.

Камэнтуючы журналістам неабходнасьць правядзеньня мітынгу, старшыня РАІК Сяргей Драздоўскі адзначыў, што ў Беларусі дзяржава не захоўвае канстытуцыйныя правы інвалідаў-калясачнікаў, у прыватнасьці, права на годнае сацыяльнае забесьпячэньне, адукацыю, ахову здароўя, працу, удзел у жыцьці дзяржавы. Паводле мітынгоўцаў, асаблівую небясьпеку для беларускіх інвалідаў з хранічнымі захворваньнямі “ўяўляе неабдуманы і непадмацаваны страхавым полісам пераход на платныя паслугі, у выніку чаго мы ня зможам праходзіць рэабілітацыію і атрымоўваць лячэньне”.

Сёньня дзяржаўныя органы не валодаюць інфармацыяй ні пра колькасьць інвалідаў-калясачнікаў, ні аб іх працаўладкаванасьці. У асацыяцыі інвалідаў-калясачнікаў такіх чалавек 700. Адмыслоўцы сьцьвярджаюць, што інвалідаў, якія ня ходзяць, усяго ў краіне ад 8 да 12 тысячаў.

Удзельнікі акцыі прынялі зварот да ўладаў, у якім гаворыцца аб жаданьні “быць паўнапраўнымі грамадзянамі краіны”.