У Менску пачалі адключаць гарачую ваду :: Хартыя'97 :: Навiны

Працэдуры закальваньня з дапамогаю халоднага абліцьця менчукам лепей пачынаць зараз – пачынаецца лета, а значыць традыцыйная падрыхтоўка цеплавых сецяў Менску да працы ў зімовых умовах. Тым больш што ў апаведнасьці з зацьверджаным Менгарвыканкамам графікам выпрабаваньня й рамонт цепласецяў былі пачатыя не далей як учора. Пад халодны душ сталі жыхары дамоў у раёне Партызанскага праспэкту, праспэкту Пушкіна і ў цэнтры Менску. Прыняць гарачую ванну ў гэтых дамох давядзецца толькі 31 траўня, а дзе (у прыватнасьці ў Фрунзенскім раёне) – 2 чэрвеня...

Як паведамілі карэспандэнту “Камсамолкі” супрацоўнікі Менскіх цеплавых сецяў, тэрмін адключэньня гарачай вады сёлета браўся з запасам: “Будзем старацца справіцца за два тыдні, але, самі разумееце, цепласеці ў Менску далёка ня новыя, выпрабаваньні й рамонт змогуць заняць шмат часу”. Але дакладна, што ня больш за тры тыдні.

Гарантавана за два тыдні будуць адрамантаваныя тыя цепласеці, якія знаходзяцца пад кантролем вытворчага прадпрыемства “Менсккамунцепласець” – гэта 35 кацельных па горадзе, якія абслугоўваюць, у прыватнасьці, дамы ваенных гарадкоў Масюкоўшчыны і Ўручча.

Менчукам варта нагадаць, што ў пэрыяд выпрабаваньняў аб пашкоджаньнях цеплапровадаў – калі вы выявілі цеч зь зямлі, калодзежаў і правалаў грунту - паведаміце ў бліжэйшы ЖЭС. Тамсама можна атрымаць і інфармацыю аб канкрэтных тэрмінах адключэньня гарачай вады ў вашым доме ці паскардзіцца на незахаваньне гэтых тэрмінаў.