Перамога прадпрымальнікаў :: Хартыя'97 :: Навiны

Арэндная плата за гандлёвыя месцы ў гандлёвым цэнтры “Купалаўскі” зьніжаная на 30 адсоткаў. Замест 150 эўра, якія прадпрымальнікі плацілі штомесяц за адзін квадратны месяц, арэндная плата будзе складаць 105 эўра.

За некалькі апошніх месяцаў сытуацыя на адной з самых вядомых выставаў-продаж Менску – “Гандлёвы цэнтар “Купалаўскі” рэзка пагоршылася. Праз занадта высокую арэндную плату за гандлёвыя месцы, якое прадпрымальнікі апынуліся ня ў стане аплочваць, праз нізкую пакупніцкую здольнасьць, за некалькі апошніх месяцаў вызвалілася каля 20 адсоткаў гандлёвых месцаў. З 117 гандлёвых месцаў былі кінутыя 24.

Прадпрымальнікі неаднаразова спрабавалі выправіць становішча, спрабуючы наладзіць дыялёг з адміністрацыяй гандлёвага цэнтру. Але ўсе спробы былі безвыніковымі. Існаваньне гандлёвага цэнтру “Купалаўскі” стала пад пагрозаю. Астатнія прадпрымальнікі сур’ёзна задумаліся пра пошук новых гандлёвых плошчаў з больш нізкай арэнднай платай.

У канцы красавіка прадпрымальнікі выставы зьвярнуліся па дапамогу ў РАА “Прыватная ўласнасьць”. Быў складзены ліст-зварот з практычнымі прапановамі па нармалізацыі сытуацыі на выставе. У прыватнасьці, арэндную плату прапаноўвалася зьнізіць на 50 адсоткаў. Таксама выказваліся прапановы, якія маглі б выправіць сытуацыю на “Купалаўскім” у будучыні.

Пад лістом падпісаліся ўсе прадпрымальнікі, якія засталіся на выставе. Леанід Малахаў, сустаршыня РАА “Прыватная ўласнасьць” і Кацярына Чыжык, старшыня Рады па дробным бізнэсе й гандлі пры Беларускім зьвязе прадпрымальнікаў, перадалі ліст ў тры інстанцыі: першаму намесьніку старшыні Менгарвыканкаму Ярохіну Н.М., старшыні ўпраўленьня прадпрымальніцтва Менгарвыканкаму Каліноўскаму А.А. і генэральнаму дырэктару УП “Менскі аптовы рынак”. 13 траўня прайшло паседжаньне камісіі, створанай адмыслова для вырашэньня гэтай праблемы. У выніку было прынятае рашэньне зьнізіць арэндную плату.