Больш за 100 беларускіх прадпрыемстваў мадэрнізуюць разам з Расеяй савецкае ўзбраеньне :: Хартыя'97 :: Навiны

Больш за 100 беларускіх прадпрыемстваў удзельнічаюць у сумесных з Расеяй праграмах мадэрнізацыі савецкага ўзбраеньня. Пра гэта заявіў на сустрэчы з журналістамі ў Нацыянальным прэс-цэнтры кіраўнік расейскай дэлегацыі на выставе "MILEX-2003", намесьнік старшыні Камітэту Расейскай Фэдэрацыі па ваенна-тэхнічным супрацоўніцтве Ўладзімер Паляшчук. У ваенна-тэхнічным супрацоўніцтве Расеі доля Беларусі, на яго думку, калі параўноўваць з іншымі краінамі СНД, самая значная. А мадэрнізацыя ўзбраеньня, лічыць Уладзімер Паляшчук, “на бліжэйшыя 5-10 гадоў будзе складаць львіную долю паслугаў ваенна-тэхнічнага характару ў сьвеце”.

Паводле Ўладзімера Паляшчука, вельмі пасьпяхова разьвіваецца беларуска-расейскае супрацоўніцтва ў сфэры оптыка-электроннага абсталяваньня. Карпарацыя “Рособоронэкспорт” рэалізавала шэраг кантрактаў на пастаўку ў трэція краіны расейскай бранетэхнікі, укамплектаванай беларускімі аптычнымі прыборамі новага пакаленьня. Ёсьць патэнцыял у сумеснага прадпрыемства сродкаў радыёсувязі. Іх плянуецца выкарыстоўваць у распрацоўваемых беларускай абаронкай аўтаматызаваных сыстэмах кіраваньня войскамі й зброяй, а таксама для тэхнічнага забесьпячэньня нашага войска сродкамі мабільнай радыёсувязі тыпу “Акведук”. Адным з прыкладаў узаемавыгоднай інтэграцыі Ўладзімер Паляшчук назваў мадэрнізацыю ЗРК "Пячора", праведзеную Міждзяржаўнай фінансава-прамысловай групай “Абарончыя сыстэмы”, куды ўваходзяць 24 расейскія і 3 беларускія прадпрыемствы. Сумесны варыянт мадэрнізацыі - ЗРК "Пячора-2М" – нядаўна перамог у міжнародным тэндэры ў адной з блізусходніх краінаў.

Як адзначыў Уладзімер Паляшчук, эфэктыўнасьць ваенна-тэхнічнага супрацоўніцтва Беларусі й Расеі павінна ўзрасьці па меры фармаваньня адзінай абарончай замовы дзьвюх краінаў і распрацоўкі сумесных праграмаў узбраеньня.