У Беларусі разьбяруцца з сацыяльнымі ільготамі :: Хартыя'97 :: Навiны

Аляксандар Лукашэнка назваў “непрымальным” той факт, што ў “10-мільённай краіне амаль 7 млн. людзей жывуць за кошт іншых”. Як паведамілі “Росбалту” ў прэс-службе беларускага лідэра, пра гэта Лукашэнка заявіў у сераду ў Менску на нарадзе па пытаньнях упарадкаваньня сацыяльных ільготаў і аказаньня сацыяльнай падтрымкі насельніцтву.

Паводле кіраўніка Беларусі, у краіне склалася “парадаксальная сытуацыя: з аднага боку, усе падтрымліваюць перадвыбарныя заявы й праграмныя выступы аб неабходнасьці навядзеньня парадку ў гэтай сфэры, але калі даходзяць да канкрэтных мераў, якія закранаюць канкрэтных грамадзянаў, некаторыя пачынаюць абурацца”. Лукашэнка ўказаў, што неабходна “набрацца мужнасьці і ўпарадкаваць ільготы й прывілеі”, многія зь якіх, паводле яго, былі ўведзеныя яшчэ ў сталінскія гады. “Гэтыя ільготы перайшлі з савецкіх часоў, а крыніцаў фінансаваньня не засталося”, -- наракаў беларускі лідэр. Так, у 2003 годзе ў Беларусі на фінансаваньне сацыяльных ільготаў прадугледжана выдзяленьне зь бюджэту каля 520 млрд. беларускіх рублёў. “Мы выдатна разумеем, што ідзем на непапулярныя меры, але калі захаваем такое становішча справаў, то эканоміка краіны проста разваліцца”, -- перакананы Лукашэнка.

На яго думку, у Беларусі варта дакладна вызначыць катэгорыі насельніцтва, якія будуць мець ільготы, і канкрэтныя ільготы, якія дзяржава будзе гарантавана даваць. Лукашэнка вызначыў канцэпцыю выдачы сацыяльных ільготаў, згодна якой падтрымка дзяржавы павінна быць гарантаваная інвалідам, дзецям-сіратам, пэнсіянэрам і тым, перад кім вы ў нявыплатным даўгу”, -- Героям Савецкага Саюзу й Сацыялістычнай Працы, ветэранам і ўдзельнікам Вялікай Айчыннай вайны. Пры гэтым, падкрэсьліў беларускі лідэр, ільготамі павінны рэальна карыстацца “толькі тыя, каму яны прадстаўленыя”.