«Рособоронэкспорт» прадставіў усе віды зброі, вырабляемай у Расеі :: Хартыя'97 :: Навiны

Увесь спэктар вырабляемага ў Расеі ўзбраеньня на выставе «MILEX-2003» у Менску прадставіла карпарацыя «Рособоронэкспорт». З рашэньня ўраду Расейскай Фэдэрацыі «Рособоронэкспорт» выступіў арганізатарам адзінай расейскай экспазыцыі. Сярод узораў ваеннай тэхнікі, зь якімі могуць азнаёміцца наведвальнікі, -- франтавы зьнішчальнік МіГ-29СМТ, бронетранспартэры БТР-80А, БТР-90, танкі Т-90С і Т-80У, варыянты мадэрнізацыі тэхнікі савецкай вытворчасьці, разнастайнае радыёэлектроннае абсталяваньне.

Асаблівую ўвагу гасьцей выставы прыцягвае ўнікальны зянітны ракетны комплекс сярэдняй дальнасьці "Бук-М1-2" з мадэрнізаванай ракетай. Гэта адзіны ў сьвеце комплекс, які зьбівае ня толькі паветраныя цэлі, уключна з “ракетамі-нявідзімкамі”, але й караблі. Характэрна, што многія ўзоры створаныя пры ўдзеле беларускіх прадпрыемстваў. Гэта, напрыклад, мадэрнізаваны ЗРК "Пячора-2М", а таксама авіяцыйныя станцыі тыпу Р-864. Адмыслоўцы адзначаюць, што гэтыя сродкі сувязі, у якіх выкарыстоўваюцца беларускія элемэнты камплектацыі, маюць шырокія пэрспэктывы для новага й мадэрнізаванага парку авіятэхнікі.

Як адзначыў на сустрэчы з журналістамі кіраўнік дэлегацыі “Рособоронэкспорта” дарадца генэральнага дырэктара карпарацыі Вячаслаў Аўчыньнікаў, “удзел расейскіх абарончых галінаў прамысловасьці на выставе “MILEX-2003” накіраваны на далейшае разьвіцьцё ваенна-тэхнічнага супрацоўніцтва зь Беларусьсю, краінамі СНД і эўрапейскага рэгіёну”. Паводле Вячаслава Аўчыньнікава, летась “Рособоронэкспорт” паставіў заказчыкам з болей чым 60 дзяржаваў прадукцыі на 4 мільярды даляраў ЗША, а экспартны партфэль карпарацыі пераўзыходзіць 12,5 мільярдаў даляраў.