Ня дайце дзецям памерці галоднай сьмерцю! :: Хартыя'97 :: Навiны

Работнікі Асьвейскай школы-інтэрнату Верхнедзьвінскага раёну накіравалі лісты Аляксандру Лукашэнку, міністру адукацыі Беларусі Пятру Брыгадзіну й старшыні Віцебскага аблвыканкаму Ўладзімеру Андрэйчанку, у якіх выказваюць сваю закляпочанасьць адносна заплянаванага ўлетку 2003 году закрыцьця школы-інтэрнату.

У Асьвейскай школе-інтэрнаце жывуць і вучацца больш за 100 выхаванцаў з дыягназам алігафрэнія ў ступені дэбільнасьці. Таксама ў школе 14 дзяцей-сірат. “Пераважная большасьць нашых навучэнцаў – зь вельмі бедных і неспрыяльных сем’яў, -- гаворыцца ў лісьце работнікаў школы-інтэрнату. Толькі знаходжаньне гэтых дзяцей у нашай школе на няпоўным дзяржаўным забясьпячэньні неяк іх падтрымлівала... Для нас відавочна, што па месцу жыхарства многія дзеці проста ня здолеюць наведваць школу праз недахоп вопраткі, абутку, ежы, у рэшце рэшт. Таму без перабольшваньня можна сказаць, што пры такім рашэньні далейшага лёсу нашых выхаванцаў існуе рэальная небясьпека іх галоднай сьмерці”.

Як паведамляе БелаПАН, калектыў Асьвейскай школы-інтэрнату налічвае 78 чалавек, зь іх 38 пэдагогаў і 40 чалавек абслугоўваючага пэрсаналу. Сярэдні ўзрост пэдагагічнага складу – 38 гадоў, 80 адсоткаў маюць вышэйшую адукацыю. Як адзначаецца ў лісьце, у выпадку закрыццья інтэрнату ўсе гэтыя людзі могуць стаць беспрацоўнымі.