Амбасадар АБСЭ сустрэўся з асуджанымі журналістамі :: Хартыя'97 :: Навiны

Вечарам 20 траўня ў Горадні адбылася сустрэча амбасадара АБСЭ ў Беларусі Эбэрхарда Хайкена з журналістамі Паўлам Мажэйкам, Мікалаем Маркевічам і супрацоўнікамі закрытай уладамі газэты "Пагоня".

"Мой візыт сёньня – гэта свайго роду першая падтрымка, якую офіс АБСЭ можа аказаць вам у вашай сытуацыі", - заявіў Э.Хайкен супрацоўнікам рэдакцыі.

Амбасадар цікавіўся наколькі важная й дзейсная падтрымка міжнароднай грамадзкасьці й праваабарончых арганізацыяў, як існуе рэдакцыя “Пагоні” ў цяперашніх умовах. Амбасадар таксама выказаў гатоўнасьць аказаць любую магчымую дапамогу рэдакцыі ў працэсе рэгістрацыі новага выданьня.

Сустрэча з рэдакцыйным калектывам прайшла ў рамках двухдзённага візыту Э.Хайкена ў Градню, які пачаўся 20 траўня.

“Візыт у рэдакцыю “Пагоні” – гэта сапраўды мужны ўчынак амбасадара ў тых умовах, у якіх місія працуе сёньня, -- сказаў М.Маркевіч. -- Мы спадзяемся, што ён стане яскравым сігналем для ўладаў аб тым, што дзеяньні па ўціску дэмакратыі ў краіне не застаюцца незаўважанымі”.

21 траўня Э.Хайкен намерваецца сустрэцца з прадстаўнікамі грамадзкай арганізацыі “Ратуша”, супраць якой распачатая судовая справа аб ліквідацыі.

У рамках афіцыйнай часткі візыту ў Горадні амбасадар сустрэўся з старшынём Гарадзенскага аблвыканкаму Ўладзімерам Саўчанкам. На сераду заплянаваная сустрэча з выкладчыкамі й студэнтамі Гарадзенскага дзяржаўнага ўнівэрсытэту імя Я.Купалы.