Свабоду прафэсару Бандажэўскаму! :: Хартыя'97 :: Навiны

Амэрыканскі офіс «Міжнароднай амністыі» пачаў збор подпісаў за вызваленьне прафэсара Юрыя Бандажэўскага, вядомага беларускага навукоўца, які знаходзіцца ў турэмным зняволеньні. «Мы лічым, што выпадак з Бандажэўскім – гэта выклік ня толькі правасудзьзю. Пад пагрозаю сталася права ведаць праўду, у тым ліку і праўду па ўздзеяньню радыяцыі на нашае жыцьцё, права навукоўца праводзіць навуковыя даследаваньні і друкаваць вынікі гэтых даследаваньняў... Незалежнасьць усіх навуковых даследаваньняў, што стаяць на службе ў чалавецтва – ня менш важны дэмакратычны прынцып чымсьці справядлівасьць Фэміды. Расправа над Бандажэўскім зьневажае два гэтыя прынцыпы. Зыходзячы з гэтага, мы патрабуем неадкладнага вызваленьня прафэсара Юрыя Бандажэўскага і прадастаўленьня яму права безперапынна працягваць навуковую працу ў сваім інстытуце» – гаворыцца ў заяве міжнароднай праваабарончай арганізацыі.

Міжнародныя праваабаронцы плянуюць надрукаваць гэты маніфэст у вядомых сусьветных выданьнях і накіраваць яго кіраўніцтву Беларусі.

Прафэсар Юры Бандажэўскі знаходзіцца ў менскай турме з чэрвеня 2001 года. Вядомы доктар і экспэрт па пасьлядоўнасьцях радыяктыўнага захворваньня пасьля Чарнобыльскай аварыі. Перад сваім арыштам ў 1999-м годзе Бандажэўскі надрукаваў сваю справаздачу з крытыкай афіцыйных даследаваньняў, якія праводзіліся беларускім урадам сумесна зь міжнароднымі фондамі па вывучэньні наступстваў Чарнобылю.