Зьмяніліся патрабаваньні для атрыманьня візы ў Латвію :: Хартыя'97 :: Навiны

У сувязі з уступленьнем у сілу ў траўні 2003 году новага латвійскага закону аб іміграцыі зьмяніліся патрабаваньні для атрыманьня візы ў Латвію. Як паведаміла БелаПАН другі сакратар па консульскіх пытаньнях амбасады Латвіі ў Беларусі Марыя Ягорушкіна, зараз для атрыманьня латвійскай візы беларускім грамадзянам патрабуецца запрашэньне ад фізычнай ці юрыдчнай асобы з Латвіі, пацьверджанае Ўпраўленьнем па справах грамадзянства й міграцыі, а таксама страхавы поліс, які гарантуе пакрыцьцё выдаткаў на магчымыя мэдычныя паслугі.

Такім чынам, новы закон аб іміграцыі прадугледжвае, што ўязную візу ў Латвію нельга будзе атрымаць на падставе турыстычнай ці курортнай пуцёўкі, акрамя таго, адмененыя й групавыя візы. Для атрыманьня візы неабходная і наяўнасьць пэўнай сумы грошай -- 40 эўра ў суткі пры пражываньні ў гатэлі, і 20 эўра – для тых, хто спыніўся ў людзей, што выслалі запрашэньне. Акрамя таго, латвійскі бок можа патрабаваць дакумэнты, якія пацьвярджаюць наяўнасьць неабходных для праезду й пражываньня сродкаў, напрыклад, рахунак у банку, сума заробку і г.д.

Пры гэтым згодна закону, калі запрошаны парушыць візавы рэжым, то выдаткі па яго высылцы з краіны будзе несьці ці сам замежнік, ці асоба, якая яго запрасіла.

Зьмены парадку ўезда ў краіну закрануць ня толькі беларусаў, але й грамадзянаў іншых дзяржаваў, у прыватнасьці, краінаў СНД, якім для наведваньня Латвіі неабходная віза.