ААН выступае ў абарону «Ратушы» :: Хартыя'97 :: Навiны

Прадстаўнік ААН у Рэспубліцы Беларусь Ніл Бунэ накіраваў на імя Аляксандра Сянькевіча, кіраўніка Ўпраўленьня юстыцыі Гарадзенскага аблвыканкаму, афіцыйны ліст адносна ліквідацыі грамадзкага аб’яднаньня “Ратуша”.

У лісьце гаворыцца, што Прадстаўніцтва ААН у Рэспубліцы Беларусь сумесна зь Міністэрствам адукацыі РБ ажыцьцяўляе праект “Інтэрнэт”, які садзейнічае забесьпячэньню доступу да сеціва Інтэрнэт установаў адукацыі, аховы здароўя, культуры, СМІ, а таксама грамадзкіх аб’яднаньняў. Партнэрам па рэалізацыі праекту на тэрыторыі Гарадзенскай вобласьці зьяўляецца ГООО “Ратуша”.

На думку Прадстаўніцтва, дзейнасьць грамадзкага аб’яднаньня ў рамках вышэйзгаданага праекту заслугоўвае станоўчай адзнакі, а ліквідацыя “Ратушы” сур’ёзна абцяжарыць рэалізацыю праекту ў Гарадзенскай вобласьці й значна скароціць інфармацыйна-адукацыйныя магчымасьці жыхароў гораду й рэгіёну. За мінулы год кампутарнай тэхнікай “Ратушы” карысталіся амаль паўтары тысячы чалавек з больш як 35 арганізацыяў.

Копіі ліста атрымалі таксама міністар адукацыі Рэспублікі Беларусь П.Брыгадзін і старшыня Гарадзенскага абласнога суда А.Грынкевіч, паведамляе сайт www.hrodna.by.

Нагадаем, што справа аб ліквідацыі “Ратушы” будзе разглядацца ў Гарадзенскім судзе сёньня.