Сяргея Скрабца «здалі» пракуратуры :: Хартыя'97 :: Навiны

Генэральная пракуратура Беларусі мае права распачынаць адносна беларускіх парлямэнтараў крымінальныя справы, нягледзячы на дэпутацкую недатыкальнасьць, якой яны валодаюць. Пра гэта заявіў у сераду журналістам віцэ-сьпікер “палаты прадстаўнікоў” Уладзімер Канаплёў, камэнтуючы распачынаньне пракуратурай краіны крымінальнай справы адносна “дэпутата” Сяргея Скрабца.

“Генпракуратура мае права распачынаць крымінальную справу адносна дэпутатаў, калі яны падазраваюцца ў сур’ёзным злачынстве, напрыклад, у крадзяжы ў асабліва буйным памеры”, -- удакладніў Канаплёў.

Ён не пагадзіўся зь сьцьвярджэньнем, што распачынаньне крымінальнай справы адносна Скрабца зьвязанае зь яго палітычнай дзейнасьцю.

“Гэта ня першы выпадак у Беларусі, калі многія з тых, хто правараваўся і адносна якіх распачатыя крымінальныя справы, зьвязваюць гэта з палітыкай”, -- адзначыў віцэ-сьпікер.

Ён паведаміў, што пракуратура Беларусі паведаміла кіраўніцтву “парлямэнту” аб распачынаньні крымінальнай справы адносна Сяргея Скрабца паводле артыкулаў: арганізацыя злачыннай групы й вымантачваньне крэдытаў.

Справа “дэпутата” Скрабца, паводле Канаплёва, разглядаецца ў рамках крымінальнай справы, заведзенай на прадстаўнікоў гандлёвага дому “Бел-Бабаеўскі” і кампаніі “Белтрэйдэкспа”.

Да абраньня ў “парлямэнт”, Скрабец ачольваў Гандлёвы Дом “Бел-Бабаеўскі”.

У пракуратуры Беларусі пакуль не камэнтуюць факт распачынаньня адносна “дэпутата” крымінальнай справы, спасылаючыся на дамоўленасьць з сьледчым, які вядзе дадзеную справу.