Расейскія праваабаронцы патрабуюць расьсьледаваньня «гучных справаў» у Беларусі :: Хартыя'97 :: Навiны

Расейскія праваабарончыя арганізацыі “Інфармацыйна-прававы цэнтар “Мэмарыял”, “Прававая абарона” і “Цэнтар падтрымкі грамадзянскіх ініцыятываў “Адкрытае грамадзтва” (Екацерынбург) зьвярнуліся да генэральнага пракурора Беларусі Віктара Шэймана з просьбай правесьці “поўнае і аб’ектыўнае расьсьледаваньне” фактаў зьнікнеьня ў Беларусі вядомых палітыкаў і журналіста Зьмітра Завадзкага.

“Мы апасаемся, што беспакаранасьць такіх выпадкаў можа надалей справакаваць такія ж сур’ёзныя злачынствы”, -- заявілі ў лісьце расейскія праваабаронцы.

Яны заклікалі В.Шэймана “аднавіць папярэдняе расьсьледаваньне па крымінальнай справе 110351 па фактах зьнікненьня Віктара Ганчара і Анатоля Красоўскага, якое знаходзіцца ў выкананьні ў пракуратуры Менску і якое было прыпыненае 20 студзеня 2003 году".

“Просім пракантраляваць правядзеньне ўсіх неабходных сьледчых дзеяньняў, пашырыць і ўмацаваць сьледча-апэратыўныя групы, якія ажыцьцяўляюць расьсьледваньне абставінаў зьнікненьня Ю.Захаранкі, В.Ганчара, А.Красоўскага, З.Завадзкага шляхам прыцягненьня высокакваліфікаваных адмыслоўцаў органаў Пракуратуры РБ, КДБ і МУС, высокакваліфікаваных замежных адмыслоўцаў, а таксама шляхам выкарыстаньня сучасных адмысловых вышукных, інфармацыйна-тэхнічных і іншых сродкаў і мэтадаў”, -- гаворыцца ў звароце расейскіх праваабаронцаў.