Валерыя Шчукіна пазбаўляюць прапіскі й жыльля :: Хартыя'97 :: Навiны

Калегія па грамадзянскіх справах Віцебскага абласнога суда пакінула ў сіле рашэньне суда Полацкага раёну і г.Полацку аб высяленьні вядомага апазыцыянэра, журналіста й праваабаронцы Валерыя Шчукіна з інтэрнату Полацкага агратэхнічнага каледжу, дзе ён меў прапіску апошнія сем гадоў. Сваё высяленьне Шчукін наўпрост зьвязвае з сваёй палітычнай дзейнасьцю, і ў прыватнасьці, з удзелам у кампаніі па выбарах у мясцовыя Саветы, калі ён балятаваўся ў дэпутаты Полацкага гарсавету.

У той самы дзень, калі Валеры Шчукін падаў дакумэнты на рэгістрацыю сваёй ініцыятыўнай групы, яго патэнцыяльны супернік, дырэктар агратэхнічнага каледжу Ўладзімер Дзюбо падаў заяву ў Суд Полацкага р-ну г. Полацку з мэтай высяліць канкурэнта з падведамственнага інтэрнату. І суд задаволіў яго скаргу і прызнаў сам факт засяленьня апазыцыянэра ў полацкі інтэрнат незаконным.

У гэтым інтэрнаце Шчукін прапісаўся сем гадоў таму, калі быў абраны дэпутатм Вярхоўнага Савету 13-скліканьня і пажадаў быць побач з сваімі выбарцамі.

“Я не ўваходжу ні ў адну партыю, і таму балятавацца вымушаны выключна па месцу жыхарства. А па месцу жыхарства, у Полацку, чалавек, які мае значны палітычны досьвед, уладам не патрэбны. І таму яны робяць усё, каб высяліць мяне з Полацку”, -- сказаў Шчукін.

У сувязі з рашэньнем Калегіі па грамадзянскіх судох Віцебскага абласнога суда Валеры Шчукін падаў скаргу ў парадку нагляду старшыню Віцебскага абласнога суда.