У Менску прайшоў мітынг «Не — агалечваньню народа! » :: Хартыя'97 :: Навiны

Каля дзьвюх тысячаў чалавек прынялі ўдзел у санкцыянаваным мітынгу пратэсту "Не — агалечваньню народа!", які прайшоў вечарам 22 траўня ў парку імя 50-годзьдзя Кастрычніка ў Менску. Заяўку на правядзеньне акцыі падаваў у гарвыканкам Беларускі прафсаюз работнікаў аўтамабільнага й сельскагаспадарчага машынабудаваньня (АСМ). Актыўны ўдзел у яе арганізацыі прыняў яшчэ адзін рэспубліканскі прафсаюз -- работнікаў радыёэлектроннай прамысловасьці (РЭП).

Адкрываючы мітынг, лідэр прафсаюзу АСМ Аляксандар Бухвостаў паведаміў, што асноўная мэта акцыі -- заявіць ураду аб патрабаваньнях прафсаюзу. Паводле А.Бухвостава, патрабаваньні й прапановы па паляпшэньні сацыяльна-эканамічнай сытуацыі былі накіраваныя ва ўрад 24 красавіка. 14 траўня быў атрыманы афіцыйны адказ, у якім практычна няма станоўчай рэакцыі ні на адно з пастаўленых пытаньняў. Такім чынам, прафсаюз быў вымушаны прыцягнуць увагу да сваіх патрабаваньняў акцыяй пратэсту.

Пры гэтым А.Бухвостаў адзначыў, што “ўсе праблемы былі б вырашаныя”, калі б такія мітынгі зьбіралі не некалькі тысячаў, а сотні тысячаў чалавек. “Пакуль толькі два галіновыя прафсаюзы рашыліся на такі спосаб адстойваньня сваіх інтарэсаў”, -- канстатаваў ён.

На мітынгу выступіў старшыня прафсаюзу РЭП Генадзь Фядыніч, лідэр беларускага кангрэсу дэмакратычных прафсаюзаў Аляксандар Ярашук, кіраўнікі й прадстаўнікі прафсаюзных камітэтаў розных прадпрыемстваў, у тым ліку такіх буйных, як Менскі маторны завод і Менскі падшыпнікавы завод. Яны крытыкавалі сацыяльна-эканамічную палітыку, а таксама дзейнасьць новага кіраўніцтва Фэдэрацыі прафсаюзаў Беларусі, якая, на думку выступоўцаў, ня ў стане рэальна абараняць правы працоўных.

Удзельнікі мітынгу прынялі рэзалюцыю з шэрагам патрабаваньняў да ўраду. У іх ліку – забясьпечыць адмену ўсіх рашэньняў па “замарожваньні” заробку; спыніць рост коштаў на спажывецкія тавары, тарыфы на жыльлёва-камунальная паслугі й транспарт; прыняць і пачаць рэалізацыю эфэктыўнай праграмы па захаваньні й стварэньні працоўных месцаў; зьмяніць сыстэму падаткаабкладаньня прамысловых прадпрыемстваў. Спыніць адміністратыўныя паборы; адмовіцца ад увядзеньня платных паслугаў у дзяржаўных мэдустановах і іншыя патрабаваньні.

У выпадку адмовы ўраду ад іх разгляду й прыняцьця адпаведных рашэньняў, удзельнікі мітынгу заяўляюць аб гатоўнасьці правесьці ў верасьні-кастрычніку сёлетняга году масавыя акцыі па выказваньні недаверу ўраду, паведамляе БелаПАН.